76-inik ukiulik Ketty Jakobsen Qaqortumi qimataasoq

Takorluulaaruk tusaasaqarpiarsinnaanak takusaqarpiarsinnaanallu ikiortissaqarnak illoqarfigisat qimallugu nakorsiarlutit illoqarfissuarmukarlutit. Nanortalimmiit Nuummut nakorsiat ilaat, 76-inik ukiulik Ketty Jakobsen taama misigisaqaqqammerpoq.

Angalanerli pilersaarutigineqartutut ingerlanngilaq, Ketty Jakobsenimi Qaqortumi puttasunut qimaannarneqaraluarpoq.

Ketty Jakobsen Nanortalimmi utoqqaat illuanni najugaqartoq Nuummut misissortikkiartorniarluni juulip 23-ani Nanortalimmiit avannamut angalanissaminut ikiortissalerneqanngilaq.

Angallalli ilaaffigisaat teknikkikkut ajoquteqalermat ilaasut Qaqortumut niugallarneqarput.

- Ilamma qimagaraminnga uanga paasinnginnakku susoqarnersoq. Tappiinnermik, immaqa aamma oqarfigineqarsimagaluarpunga kisianni tusilarnermik, Ketty Jakobsen oqarpoq.

Ikiorteqarnissamut piumasaqaatit:

  • Napparsimasoq inuunerminik ulorianartorsiorpat pinasuartumilluunniit aallarunneqarpat.
  • Nappaat pissutaalluni ikiorneqarnissaq pisariaqarpat.
  • Nakorsiaq ikiorteqarani angalasinnaappat, angalanermi angallasseqatigiiffiup piumasarinngippagu ikiorteqarnissaa, Kalaallit Nunaanni Peqqinnissaqarfiup qullersaqarfiata ikiorti akiliussinnaanngilaa.
  • Innarluutillit ikiorteqaratik angalasinnaanngitsut kommuuniminut ikiorteqarnissartik qinnutigisinnaavaat.

Najoqqutaq: Kalaallit Nunaanni Peqqinnissaqarfiup qullersaqarfia.

Qaqortumi sissiukkami kiserrammi akunnerup affaata missaa paasisimasaqarani uninngasimavoq.

- Sivisulaartumik assut qiiallunga utaqqivunga, anorlilaarami. Paatsivissaqarnangalu saaffissaqannginnama eqqannguanni inoqannginnami. Sissiigaarakasimmi kisimiillunga qimataagama.

- Ikiortissaaleqillunga assut eqqarsarpunga "kinannguaruna ikiortiseriniassavara?"

Iluatsitsinerinnarmilli inussivoq

Ketty Jakobsen saaffissaaleqileruttortoq nukappiaraq sanioqquppoq:

- Qujanavissumik nukappiarannguaq aggerami immaqa marserluni, taassuma ikiorlunga toortaatikkaminga oqaloqatiginnippunga.

Ketty Jakobsen Nuummut nakorsiartarnermi siuliini ingerlaqateqartinneqartarsimagaluarpoq. Kisimi angalatinneqarneranut oqalussinnaanera pisussinnaaneralu nakorsaqarfimmit tunngavilersuutigisimagaat Ketty Jakobsen oqarpoq.

Kommunimut qinnuteqarsimasinnaagaluarput

Ketty Jakobsen Nuummi misissortereerluni kujammut sisamanngornermi angerlarpoq. Tassani nakorsiaqataata aqqutaani ikiorpaa, naak nammineq naffakuugaluarluni.

Illoqarfitsik qimallugu nakorsiat inuunerminnik ulorianartorsiorunik, pinasuartumilluunniit aallarunneqartut kisimik ikiorteqarsinnaasut Peqqinnissaqarfiup qullersaqarfiata paasissutissiissutigaat.

Uoqqaat illuini pisortat suleqatigalugit ineqartoq nakorsiassatillugu angalanerani ingiallorteqartinneqassanersoq nalilersorneqartartoq Kommune Kujallermi ingerlatsivimmi pisortap nassuiaatigaa.

Ketty Jakobsenip Nuummut nakorsiarnissaanut ingiallorteqarnissaa kommunimut qinnutigineqarsimasinnaagaluartoq, Helga Kleistip oqaatigaa.

Tamannalu periarfissaasoq utoqqaat illuinut paasissutissiissutigineqarnissaa pikkoriffiginerusimasinnaagaluarlugu nassuerutigaa.

 

Qanorooq 05.08.2019

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat