- Tamatumalu unammillernartunngornissaa qularnanngilaq, coronamimmi tunillatsissimasut qaammatini aggersuni ukiorulu amerlanerulernissaat nalaattussaavarput, nakorsaaneq oqarpoq.Assi: Aviaaja Kielsen / KNR

7000-it akiuussutisserneqanngillat: Ukiumut unammillernarsisinnaasoq

Innuttaasut 1 procentiinnai sapaatini akunnerni kingullerni marlunni tamakkiisumik akiuussuserneqarput.

Coronavirusimut akiuussutissamik kapitinnissamut soqutiginninneq siusinnerusutulli annertutiginngilaq. Tamannali ukiorpat ajornartorsiutaalersinnaavoq.

Nakorsaaneq, Henrik L. Hansen oqarpoq. Innuttaasut 1 procentiinnaat sapaatini akunnerni marlunni kingullerni akiuussuserneqarput.

- Sapaatini akunnerni kingullerni amerliartupallanngillat, Henrik L. Hansen oqarpoq.

Inuit 568-it sapaatini akunnerni kingullerni marlunni akiuussutissamik tamakkiisumik kapitissimasut nakorsaanerup itisilerpaa. Tamanna innuttaasut 1 procentiinnaraat.

AAMMA ATUARUK Coronamut akiuussutissat: Meeqqat inuusuttullu Modernameersumik akiuussuserneqaqqissinnaalersut

Tassa imaappoq kisitsisit maannakkutut isikkoqartillugit innuttaasut 64-imit 65 procentiinut akiuussutissamik tamakkiisumik kapitissimapput.

- Ukioq pitsaasumik anigorniarlugu amerlanerugaluarunik pitsaanerungaatsiassasoq qularutissaanngilaq, nakorsaaneq oqarpoq.

Amerlanerusut kapitinnissaanut oqartussat suliniuteqaleruttortut taassuma oqaatigaa. Assersuutigalugu bussiusinnaavoq Nuummi ingerlaartoq, ikiffigalugu akiuussutissamik kapitittoqarsinnaavoq.

Sulili unammillernartoqarpoq:

- Nunaqarfinni akiuussutissamik ataavartumik neqerooruteqarfiunissap ajornarneruffigisaanni immikkut ittumik unammillernartoqarpoq. Akiuussutissanik peqqinnissaqarfimmit qaninnerpaamit tikittoqarneratigut aatsaat periarfissaqarpoq, nakorsaaneq oqarpoq.

AAMMA ATUARUK Korte køer flytter coronastik i Nuuk

Avannaata Kommuniani nunaqarfeqqortuujusumi akiuussutissamik kapitissimasut ikinnerpaaneratigut takuneqarsinnaavoq.

Tamanna nunatta naalagaaffeqatigiinni akiuussutisserneqarsimasuni procentinngorlugu ikinnerpaaneranut aamma pissutaavoq. Danmarkimi innuttaasut 74,9 procentii tamakkiisumik akiuussutisserneqarsimapput, Savalimmiunilu tamanna 68,7 procentimiilluni.

Nunat akornanni ukioqatigiiaat aamma pissutaasut, Henrik L. Hansenip erseqqissaatigaa.

- Nunatsinni inuit tamarmik akiuussutissamik kapitsissinnaannginnerat soorunami aamma eqqarsaatigineqassaaq, inuit ilaat inuusuppallaarput. Taamaammat nunani Kalaallit Nunaatut ittuni meerarpassuaqartuni nunani allani utoqqarpassuaqarfiusumitulli amerlatigisut akiuussutisserneqarsinnaanngillat.

AAMMA ATUARUK Múte B. Egede: Vaccinationer muliggør andre løsninger end nedlukning

Maannakkutut itsillugu meeqqat aqqaneq-marluk ataallugit ukioqartut akiuussutissamik kapitinneq ajorput.

Innuttaasut akiuussutisserneqarsinnaasut kisiisa qiviaraanni innuttaasut 77 procentii akiuussutisserneqareerput. Tamanna innuttaasut coronavirusimut akiuussutissamik kapitissimannginnerannik aamma isumaqarpoq. Innuttaasullu taakku 7000-iupput.

- Tamatumalu unammillernartunngornissaa qularnanngilaq, coronamimmi tunillatsissimasut qaammatini aggersuni ukiorulu amerlanerulernissaat nalaattussaavarput, nakorsaaneq oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat