700 milliardi dollarsit USA-mi inatsisartut aningaasaliissutigaat
Aningaasarsiornikkut ajornartorsiornermut ikiorsiissutit USA-mi aningaaseriviit aningaasarsiornermillu ingerlatsiviit sapaatip akunnerini kingullerni ilungersunartumik ajornartorsiornerannit annaanniartussaavai. Aningaasarsiornermik annaassiniarneq oqallisigineqaqaaq aamma periuserineqartoq isornartoqartinneqaqaaq. Tassami ikiorsiissutit immikkut aningaasaliissutinik ima ilaqartigipput, allaat tamanna inatsisartuni akuerseqataasussarsiorluni pisinertut isigineqarsinnaalluni.
Ilaatigut marloriarluni akileraarutitigut oqilisaassinerit 100 milliardi dollarsikkaat saniatigut, naalagaaffimmi nunap immikkoortuini immikkut aningaasaliisoqarpoq, tassa inatsisartunut ilaasortat immikkut ikiorsiissutissanut itigartitsisimagaluartut aggerfiinut immikkut aningaasaliisoqarluni.
Aningaasaliissutit ilaatigut tassaallutik suliffissuaq meeqqanut nerrivinnik sanaartorfik, Alaskami aalisartut miliuuninik arlalinnik tapiiffigineqartut, bilinut sukkaniuttarfiit alliniarneqartut, filmiliortartunut atuarfinnullu tapiissuterpassuit, tamakkuupput inatsisartuni ilaasortat akuersiniassammata
aningaasaliiffigineqartorpassuit ilaannaat.
Inatsisartuni ilaasortat aningaasaliissutit tamakkua qineqqusaarnerminni atorfissaqartilluarpaat, tassami novembarip sisamaanni præsidentimut qinersisoqalerpat, aamma inatsisartunut qinersisoqartussaammat.
Qinersisartut ilaasa akileraarutimik aningaasarsiornermik annaassiniarnermut atorneqarnerat kamaatigisorujussuaat, isumaqaramik aningaasat WallStreetimi aningaasarsiornermik suliaqartut bilerujussuaqaannarnissaannut neriniartarfinnilu akisuuni ulloqeqqasiortuaannarsinnaanissaannut annaassiniutaasut.
Maanna politikerit qineqqusaarnerminni oqarsinnaalerput, aningaasarsiornermik annaassiniarnissaq allatut ajornartumik pisariaqarsimasoq, kisiannili qinersisartunut aamma aningaasaliisoqartoq.
Aningaasarsiornermik annaassiniarnermut isumaqataallutik taasisut 263-iupput, akerliullutillu taasisut 171-iullutik. Partinut marluusunut ilaasortat aamma immikkoortunut marlunnut avissimapput. Demokratini amerlanerussuteqarluartut akuersipput, Republikanerit affaasa missaat akuersipput affaasalu missaat itigartitsillutik.