Pfizer/BioNTechimit akiuussutissamik maajip aallaqqaataatinnagu tamakkiisumik kapitissimasut siulliussapput.Assi: Henning Bagger/Ritzau Scanpix

65-ileereersimasut tamarmik pingajussaanik kapitingajalersut

Pfizerimit akiuussutissamik qaammatit arfinillit sinnerlugit matuma siorna kapitittunut ilaavit, taava pingajussaanik kapitinnissannut piffissanngorpoq, nakorsaaneqarfik oqarpoq.

Maajip ulluisa aallaqqaataat nallertinnagu coronamut akiuussutissamik aappassaaneerlutik kapitittunut ilaavit?

Taamaappat kapiteqqingajalerputit.

Peqqinnissaqarfiit akiuussutissamut sakkortusaataasumik boosterimik taaneqartartumik, tassa pingajussaanik kapuineq aallartilerpaat.

Nakorsaaneqarfik tusagassiuutinut nalunaarummi marlunngornermi taama allappoq.

AAMMA ATUARUK Nakorsap nunatsinni akiuussutissat misissoraa: Qasseriarluta kapitissaagut?

Pfizer/BioNTechimit akiuussutissamik maajip aallaqqaataatinnagu tamakkiisumik kapitissimasut siulliussapput.

Matumani inuit 65-ileereersimasut, inuit coronavirusimik eqqugaanissamut aarlerinartorsiortut, peqqinnissaqarfinni sulisut utoqqarnillu sullissisut matumani pineqarput.

Taamaammat nunatsinni utoqqaat illuini tamani akiuussusersuinissamik maanna aaqqissuussisoqassaaq.

Nualluummut akiuussutissaq immikkut aamma pisariaqassasoq

Eqimattanut allanut akiuussutissamik napparsimmavinni, peqqissaavinni nunaqarfinnullu tikittoqarnerani neqerooruteqartoqassaaq.

Coronavirusimut akiuussutissamik pingajussaanik kapitinnerup saniatigut nualluummut akiuussutissamik aamma neqerooruteqartoqassaaq.

Nualluummut akiuussutissaq ukioq manna immikkut ittumik pisariaqartutut nalilerneqartoq, nakorsaaneqarfik allappoq.

Tamanna coronamut killilersuinerit pissutigalugit nualluutip tuniluutinngitsoorneranik pissuteqarpoq, taamaammat innuttaasut nualluummut akiuisinnaassusaat sakkukillisimalluni.

Qaqugu sumilu akiuussuserneqarsinnaanissat pillugu nakorsaaneqarfik nittartagaani corona.nun.gl-ikkut paasissutissiissoqarumaarpoq.

AAMMA ATUARUK Coronamut nunatsinni akiuussuserneqaqqaartoq Sofie Hegelund: Annilaangalaarpunga

Akiuussutissamik siullerpaamik januaarip ulluisa sisamaanni ukioq manna kapisisoqarpoq. Matumanilu Nuummi innuttaasut 30-t aamma peqqinnissaqarfimmi, Ippiarsummilu sulisut 50-it akiuussutissamik neqeroorfigineqarlutik.

Nunatsinni coronavirusi pillugu
killiffik

Tunillatseqqasut 300  
Ullumi tunillatsittut 124  
Siullermik kapitissimasut 71%  
Aappassaa kapitissimasut 66%  
Tunillanneqarsimasut 1456  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Novembarip 29-at 13:15
 

Coronavirusimik tunillatsinissaq pinaveersaaruk