633.412 koruunit ikorfartugassanut tapiissutigineqartut
Kommunit tamakkerlutik qinnuteqarput, ilaqutariinnullu ikorfartugassanut juullimi aaqqissuussinissani tapiissutissanik tamarmik agguaassivigineqarlutik.
Namminersorlutik Oqartussat tusagassiuutinut taama nalunaaruteqarput.
Qinnuteqaatit katillugit 48-t illoqarfinnut 16-inut nunaqarfinnullu 23-nut agguaanneqarput. Tasiilami aammalu Qaanaamiit Nanortalimmut, tassa nuna tamakkerlugu, agguaassisoqarpoq.
Aningaasat katillugit 633.412 koruunit ukioq manna juullimut agguaanneqarput.
- Tuppalliutigaara nuannaarutigalugulu, kingumut ukioq manna nuna tamakkerlugu immikkut pisariaqartitsisunut juullimi aaqqissuussinernut tapiissuteqarsinnaagatta aamma ilaqutariinnut immikkut pisariaqartitsisunut ikiorsiisinnaagatta. Juullimi tamatsinnut pingaarutilissuuvoq. Isumaginninnermut naalakkersuisoq Sara Olsvig taama oqarpoq.