Akileraartarnermut Aqutsisoqarfiup akileraarutit akileqqusai amerlaneruleraluarpata illit suli aningaasaatigiinnassagitit, Akileraartarnermut Aqutsisoqarfiup pisortaata tullia, Siverth Larsen erseqqissaavoq. Assi: KNR

6000-it soraarnerussutisiassanut akiliinerussasut

Nunatsinni inuit 6.000-init amerlanerusut soraarnerussutisiaqalernissamut aaqqissuussinermut peqataasussaatitaanermut naammattumik akiliisimanngitsut akileeqquneqarput.

Soraarnerussutisiaqarnissamut aaqqissuussamut akiliinissamik puiugaqarsimasut soraarnerussutisiassanut akiligassaat aaqqinniarlugit akileraarutit aqqutigalugit ukioq manna akiliissapput.

Inuit 6.628-t tassani pineqarput.

Qanoq isertitaqartigineq apeqqutaatillugu akileraarnermi procenti marlunniit arfinilinnut qaffanneqassaaq.

AAMMA ATUARUK Pinngitsaalissummik ileqqaartitsisalerneq isumaqatigaa

Innuttaasut soraarnerussutisiaqarnissaminnut katersaqarnissamut pisussaaffitsik naammassigunikku skattekortimik nutaamik, akileraarnermi appasinnerusumik procenteqarfiusumik, tunineqarumaartut, Akileraartarnermut Aqutsisoqarfiup ilisimatitsissutigaa.

Aningaasat katersanut ilanngunneqassasut

Innuttaasulli akileraarutimik procentianik qaffaavigineqartut aningaasaatiminnik annaasaqarnissaq ernummatigisariaqanngilaat.

Akileraartarnermut Aqutsisoqarfiup akileraarutit akileqqusai amerlaneruleraluarpata, illit suli aningaasaatigiinnassagitit, Akileraartarnermut Aqutsisoqarfiup pisortaata tullia, Siverth Larsen erseqqissaavoq.

- Taakku uannut, ilinnut nunatta karsianulluunniit nakkartinneqarnavianngillat. Taakku aningaasanik katersisup nammineq soraarnerussutisiaqarfissaanut, imaluunniit aningaasarivimmi toqqortugaanut ingerlateqqinneqassapput, taavalu aningaasat taakku peqqittussaavaat, Siverth Larsen oqarpoq.

AAMMA ATUARUK Pinngitsoorani soraarnerussutisiaqalernissamut siunnersuut KNAPK-mit ilalerneqarpoq

Inuit 6.000-init amerlanerulaartut soraarnerussutisiassaminnut naammattumik akiliisimanngitsut suliffitik aqqutigalugit soraarnerussutisiaqarnermut isumaqatigiissuteqanngitsuugajuttuusut pisortap tulliata paasissutissiissutigaa. Taakkualu inuussutissarsiutaat suliffiallu assigiinngitsorujussuupput.

- Innuttaasut aalajangersimasut immikkut taamatut nalunaarsunngikkaluarlugit, kisianni takusinnaasagut malillugit kikkut tamarmik, aalisartuugunik imaluunniit allanik atorfeqarunik, pisussaaffimminnik naammassinninngitsoortarsimapput. Aalajangersimavinngilaq, Siverth Larsen oqarpoq.

Ilaat katersinissamut piumaffigineqanngillat

Soraarnerussutisiaqalernissamut aaqqissuussamut peqataasussaatitaanermut malittarisassat naapertorlugit, 100.000 koruuninit ikinnerusunik ukiumut isertitallit katersinissamut piumaffigineqanngillat.

Isertitalli pisortanit ikiorsiissutit, soorlu ineqarnermi tapiissutit meeqqanullu tapiissutit, ilanngunnagit naatsorsorneqartarput.

Soraarnerussutisiaqalernissamut aaqqissuussinermut peqataasussaatitaaneq 2018-imi jannuaarip aallaqqaataani atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.

Nunatsinni innuttaasut soraarninngorunik pitsaasumik inuunissaat pinngitsaaliilluni katersisitsisarnermut inatsimmik qulakkeerneqarniarpoq.

Aaqqissuussap pisortat aningaasaqarnikkut patajaatsumik siunissami aningaasaqarnissaannut qulakkeerinneqataanissaa Namminersorlutik Oqartussat nittartakkaminni allapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat