59-inik ukiulik Paamiut avannaanni ujarneqarpoq
Kristian Jørgensen aamma 49-inik ukiulik Heine Petersen peqatigalugu ullut aqqaneq marluk matuma siorna Paamiut avannaanut kangerlummut, Allumersanut aavaariarput. Aavariat taakka marluk ujarneqarnerat ippassaq aallartinneqarpoq, Paamiuni politiit Kangilinnguani sakkutooqarfimmut ujaasinissamik ikiorneqarnissamik qinnuteqarnerisa kingorna. Sakkutuut umiarsuaata Hvidbjørnep quliimiguua lynx helikpter atorlugu ippassaq ujaasinermi 49-inik ukiulik Heine Petersen nassaarineqarpoq. Heine Petersen Qeqertarsuatsiaarmiunit aavariartunit siullermik nassaarineqarpoq, ajunngitsoq kisiannili kaattoq qasoqisorlu. Aavariat taakkua ullut aqqaneq marluk matuma siornatigut Allumersanut aavariartillutik allaramik, angallatigaat umiatsiaq ammaannartoq poca 550. Allumersat kangerluanni, Eqalunni aasiffissaminnut pipput, tassanngaaniillu ilummut aavarfissaminnut Qoororsuarmut ingerlaqqillutik. Qoororsuarmut pinerminni angallatitertik avalattaaserniartillugu, annaavaat umiatsiarlu saavitittoorutigalugu.
Heine Petersen aasiffigisaminnut Eqalunnut ullut aqqanillit matuma siornatigut pisulluni aallarpoq, Kristian Jørgensen, taanna isigiarsuttoq, nissumigullu suliariteqqammerami pitsorluttuusoq qimallugu. Heine Petersen ullut pingasut atorlugit aasiffigisaminnut Eqalunnut pisuppoq, aqqutaani nunami sinittarluni. Heine Petersen Qeqertarsuatsiaarminit aavariartunit ippassaq nassaarineqarpoq. Taamaalinerani sakkuttuut umiarsuaata qulimiguua Lynx helikopter kangerlummi Allumersaani ujaasilluni timmisoq, Qeqertarsuatsiaarmiunit tarrarsuutit atorlugit kalerrisaarneqarpoq, kingornalu qulimiguulik Eqalunnut mippoq. Heine Petersen qulimiguumut ikeriarlugu,
Kristian Jørgensenimik kingullermik takunniffiusoq Qoororsuit eqqaalu tamaat ujaasiffigaat, maannamullu suli nassaarineqanngilaq, Paamiuni politeeqarfiup pisortaa Christer Nielsen oqarpoq.
