50 mio-kr-nit ineriartortitsinermut atorneqassapput

Danmarkip nunatsinnut tapiissutaasa ilaannit 50 mio koruunit Namminersornerullutik Oqartussani immikkoortinneqarsimapput ilinniartitaanerup, takornariaqarnerup inuussutissarsiornerullu 2005, 2006 aammalu 2007-mi ineriartortinneqarnissaannut atugassatut.

Aningaasat ilai takornariaqarnermik sullissinerup ineriartorteqqinnissaanut atorneqassapput.

Umiarsuarsuit takornarianik ilaasoqarlutik tikittartut pitsaanerusumik ataqatigiinnerusumillu sulinikkut tikilluaqquneqartalernissaat, takornariaqarnermi sulisut tamaasa ataqatigiissumik suleqatigalugit ineriartortinneqassaaq.

Aasianni takornariaqarnermi pisortaq Frederik Lundblad qaammatini makkunani nunatsinni angalatinneqarpoq, takornariartitsisut pisinnaasai suut ineriartortinneqartariaqarnersut apersuinermigut paasiniaatillugu, ilaatigut Maniitsoq, Kangerlussuaq, Aasiaat Ilulissallu tikereersimavai.

Takornariaqarneq pillugu isumasiortitsinissaq ukioq manna siulleq Maniitsumi mars-ip qaammataani ingerlanneqassaaq.