50 ørimik akiliisitsisartut nalunaarsorneqalerput

Dankortit akiliutillu allat atorlugit akiliinermi akitsuut 50 øriusoq pisiniarfiit ilaanni akilersinneqartarpoq, ilaanni atorneqanngilaq. Pisiniarfiit sorliit qanoq periaaseqarnersut Atuisartut Siunnersuisoqarfiata, kommunini pisisartut sinniisui suleqatigalugit nalunaarsortalerniarpaa, pisiniarfiilli akitsuummik bankimut ingerlatitseqqiisarnersut Siunnersuisoqatigiiffiup misissornianngilaa.

Atuisartut Siunnersuisoqatigiiffiata allattoqarfiani pisortaq Niels Peter Gundelach oqaluttuarpoq Nuummi paasiniaanerminni paasisimallugu pisiniarfiit ilaanni akitsuut pisinianut akilersinneqartartoq, allanili taamaaliortoqassanani.

Pisiniarfiit tamarmik akitsuutinik akiliisitsisinnaapput, taamaaliussagunilli allagarsiinermikkut pisisartut ilisimatissavaat. Dankortinulli tunngatillugu dankortersornerit ukiumut 5000-it sinneqaraangata aatsaat akitsuummik 50 øriusumik akiliisitsisoqarsinnaavoq. Allatut oqaatigalugu pisiniarfinni ulluni arfinilinni ammasartuni ullormut 16-eriarluni dankortimik Akiliummilluunniit akiliisartoqaraanni aatsaat akitsuummik akiliisitsisoqarsinnaavoq. Akitsuutit taakku pisiniarfiup bankimut akilertussaavai.

Akitsuummik akiliisitsigaluarlutik bankimut akiliineq ajortut, taamalu namminneq iluanaarutissaminnik kikkut akiliisitsisarnersut Atuisartut Siunnersuisoqatigiiffiata misissornianngilaa.

- Tamanna pisisartunut soqutiginanngilaq. Pisiniap taamaallaat soqutigaa 50 ørimik akiliissanerluni akiliissannginnerluniluunniit, pisiniaraangamilu qinersinnaavaa nioqqutissaq pisiniarfimmi akitsuummik akiliisitsineq ajortumi pisiarissanerlugu, imaluunniit akiliut atornagu aningaasanik akiliiginnassanerluni, Niels Peter Gundelach oqarpoq.