4.500-nit amerlanerusut soraarnerussutisiassat pillugit saaffiginnissimasut

Akileraartarnermut Aqutsisoqarfik soraarnerussutisiaqalernissaq pillugu oqarasuaatitigut immikkut saaffiginnittarfimmik akeqanngitsumik pilersitsivoq.00:00:27

Tassanilu sulisut saaffiginnittarfiup jannuaarip ulluisa 20-anni pilersinneqarneraniilli ulapittorujussuusimasut, Akileraartarnermut Aqutsisoqarfiup pisortaata tullia, Siverth Larsen oqarpoq.

- Oqarasuaat immikkut sianerfigineqarsinnaasoq pilersinneqarmalli ulloq manna tikillugu 4.500-t sinnerlugit saaffiginnissimapput, Siverth Larsen tallimanngormat oqarpoq.

Oqarasuaatitigut saaffiginnittarfiup pilersinneqannginnerani aamma ulapittut, pisortap tullia oqarpoq.

- Soraarnerussutisiaqalernissamut akiliutit peqqaarneqalermata, suliat oqarasuaatitigut, ornigulluni imaluunniit qarasaasiakkut saaffiginnissutigineqartut amerlasoorujussuusarput. Kisianni unikaallaleraluarnerisa nalaanni taanna oqarasuaatitigut immikkut saaffiginniffiusinnaasoq pilersinneqarmat, saaffiginnittartut amerleriarujussuaqqittut malugaarput, Siverth Larsen oqarpoq.

Soraarnerussutisiassat pillugit paatsuungasoqartoq

Inuit 6.628-t soraarnerussutisiaqalernissamut pinngitsoorani ilaanissamik aaqqissuussamut naammattumik akiliisarsimannginnerisa kingorna paatsuungasoqarmat, oqarasuaatitigut immikkut saaffiginniffiusinnaasoq pilersinneqarpoq.

Naammattumik akiliisimanngitsut akileraarutitigut akiliinissaat Naalakkersuisut aalajangerpaat. Tassalu naammattumik akiliisimanngitsut tuusintilikkaat akileraarutaasa procentiat marluk arfinillillu akornanni 2020-mi qaffanneqarpoq.

Tamatuma saniatigut inuit 935-t skattekortimik akileraarutip procentianik kukkusumik naatsorsuiffiusimasunik nassinneqarput. Oqarasuaatitigullu immikkut saaffiginnittarfimmut saaffiginnittut soraarnerussutisiaqalernissamut pinngitsoorani akiliisarnissaq pillugu paatsuungasuunerupput.

- Taakku eqqartukkagut (soraarnerussutisiaqalernissamut aaqqissuussamut pinngitsoorani ilaasussaaneq aaqq.) pillugit saaffiginnittut qaammatit kingulliit marluk amerlanerpaajupput. Kisianni aamma puiussanngilarput, nalinginnaasumik saaffiginnittartut taamaaginnavipput. Ukiup kaajallakkiartornerani saaffigissutigineqartartut tamakku saniatigut ingerlajuartuarmata, Akileraartarnermut Aqutsisoqarfiup pisortaata tullia, Siverth Larsen oqarpoq.

Oqarasuaatitigut immikkut saaffiginniffissaq pisariaqartinneqartillugu saaffiginniffiusinnaaginnassasoq, qanorlu pisariaqartinneqartiginersoq nalilerneqartassasoq Siverth Larsen oqarpoq.

Soraarnerussutisiaqalernissamut aaqqissuussamut suliap malitsigisaanik nunatta oqaluttuarisaanerani siullerpaamik ammasumik siunersiuisoqarpoq. Tassani aningaasaqarnermut naalakkersuisoq, Vittus Qujaukitsoq, Inatsisartut aningaasaqarnermut akileraartarnermullu ataatsimiititaliaannit apeqqutinik arlalinnik akissuteqarpoq-

Soraarnerussutisiaqalernissamut aaqqissuussamut pinngitsoorani ilaasussaatitaaneq 2018-imi jannuaarip aallaqqaataani atuutilerpoq.

Akileraarutit soraarnerussutisiassallu pillugit apeqquteqarusukkuit oqarasuaatitigut immikkut saaffiginniffiusinnaasumut normu 80 11 33-mut sianersinnaavutit.