41-nik ukiulik Nuummi qamuteralannik ajunaartoq
Angut 41-nik ukiulik qulimiguulimmik SAR-imik qaqinneqaramik piaartumik Dronning Indridip napparsimavissuanukaanneqarpoq, ajoraluartumilli annaanneqarsinnaannani.
Politiit tusagassiuutinut nalunaarummi taama allapput.
Qamuteralattup aapparisaata angalaqatini attaveqarfigiunnaariataarsimallugu, nakkarsimasorlu politiitnut ataasinngornermi ualisoq nalunaaqutaq 13:13 nalunaarutigaa.
Kinguninngualu qulimiguulik SAR ajutoorfimmukartinneqarpoq. Issittumilu sakkutooqarfiup umiarsuaa, Air Greenlandillu qulimiguuliutaa annanniut Kangerluarsunnguanut ikiuukkiartorput.
AAMMA ATUARUK Kangerluarsunnguami qamuteralannik ajutoorneq: Inuit marluk Sanamut oqqunneqarput
Angutip aappa 32-nik ukiulik qulimiguulimmik SAR-imik qaqinneqarami Issittumi sakkutooqarfiup umiarsuaanut Ejnar Mikkelsenimukaanneqarpoq.
Angutip aappaa 41-nik ukiulik, qulimiguulimmik piaarnerpaamik napparsimaviliaanneqaraluarpoq.
- 41-nik ukiulik Dronning Ingridip napparsimmavissuani peruluttut uninngavianni uummarsarneqaraluarpoq iluatsinngitsumik, ataasinngornermi unnukkut toqusoq nalunaarutigineqarpoq, Kalaallit Nunaanni politiit tusagassiuutinut allapput, ilanngullugulu oqaatigaat ilaqutaasut ilisimatinneqartut.
32-nik ukiulik timaa nillungaatsiarsimagaluarpoq, maannali ajunngitsoq politiit allapput.
Qamuteralattut mianersoqquneqartut
Nuummi qamuteralattartut kisimiillutik sikukkut ulorianartorsiorfiusinnaasukkut angallatinnginnissaat politiit sakkortuumik kaammattuutigaa. Taamatullu angallattoqartillugu attaveqarsinnaanermut atortorissaarutit ajutuulernermik nalunaarsinnaasunik, sumiissusersiutillit pingaaruteqarnerat, taamaalillutik ikiuukkiartortut pilertortumik ajutoorfimmut apuussinnaaniassammata.
