Nalunaarusiaq: 400 millioninik iluanaaruteqarnerunikkut suliffiit 430-t annaaneqassasut
Nunatsinni aalisarneq "ilaatigut pisariillisagaavoq, naak pitsaanerpaamik ingerlanneqanngikkaluarluni", nalunaarusiami KNR-ip pissarsiarisimasaani taama atuarneqarsinnaavoq. Aalisarnerulli pitsaanerulersinneqarnissaanut aningaasarsiorfiginerungaatsiarnissaanullu periarfissaqarpoq. Nalunaarusiami naatsorsuinerillu naapertorlugit ukiumut 400 millionit koruuninik aningaasarsiorfigineqarnerusinnaavoq.
Aalisarnermillu inuussutissarsiuteqarnerup aningaasatigut iluanaaruteqarfiunerunissaanut suliniutigineqarsinnaasut ilagaat kilisaatit tulaasisussaatitaanerisa atorunnaarsinneqarnissaa aamma avataani sinerissallu qanittuani aalisarnerup killeqarfiisa atorunnaarsinneqarnissaat.
Iluanaaruteqarnerunikkut suliffiit 430-t annaaneqassapput
Taamatulli, allatigullu, suliniuteqartoqarneratigut aalisarneq iluanaaruteqarfiunerulissappat, tamatuma kingunerisaanik aalisakkanik suliffissuit arlallit pisariaarutissapput suliniutigineqartullu tamaasa pissutigalugit inuit 430 missaat suliffissaarutissallutik.
Tamannalu maanna aalisarnermut politikkiusup akerleraa. Tulaassisussaatitaanikkummi aalisakkanik suliffissuit suliassaqartinnissaat sulisullu suliassaqartinnissaat akissarsiassaqartinnissaallu qulakkeerniarneqartussaavoq. Sinerissami innuttaasut ilarpassuinik suliassaqartitsivoq, naak aalisarneq tamatumunnga peqatigitillugu pitsaanerusumik ingerlanneqarsinnaagaluartoq inuiaqatigiittullu aningaasatigut iluanaarutigisagut ikinnerugaluartut.
Naalakkersuisut oqaaserfigerusunngilaat
Nalunaarusiaq tassanilu inerniliussat Naalakkersuisut KNR-imut oqaaseqarfigerusunngilaat. Nalunaarusiaq siorna decembarip qaammataani naammassineqaraluarpoq, oqaaseqarfigerusunnginneranulli avammut saqqummiunneqarsimannginnera nassuiaatigineqarpoq.
Inatsisartulli aalisarnermut ataatsimiititaliaanni siulittaasoq, Inuit Ataqatigiinneersoq Hans Aronsen, Atuagagdliutinut nalunaarusiaq pillugu oqaaseqarpoq. Nalunaarusiaq soqutiginartuunerarpaa, oqaatigaluguli suliffissat pingaaruteqartut eqqarsarluaqqissaartoqartariaqartorlu. Taamatulli oqaaseqarnini KNR-imut oqaatigeqqikkusunnagulu itiliiffigerusunngilaa.
Ataatsimiititaliami siulittaasup tulliata, Demokraatineersup Nivi Olsenip, KNR-imut oqaatigaa nalunaarusiami angusat oqallisigissallugit pingaartuusoq.
Nalunaarusiaq siorna decembarimi naammassineqarpoq sulili tassa avammut saqqummiunneqarani. Nalunaarusiaq sooq avammut saqqummiunneqarsimannginnersoq aammalu uninngatiinnarneqassanersoq KNR-ip akissutissarsisinnaasimanngilaa.
Demokraatineersup Nivi Olsenip aningaasaqarnermut akileraartarnermullu naalakkersuisumut § 37 naapertorlugu apeqquteqaateqarpoq, nalunaarusiap saqqummersinneqarnissaa naalakkersuisup, naalakkersuisoqarfiata imaluunniit Naalakkersuisuni ilaasortat allat pinngitsoortinniarsarisimaneraat apeqqutigalugu.
