40-nik ukiulik sivisujaarsuarmik utoqqaat illuaniikkallarsinnaavoq
Angut Qaqortumeersoq 40-inik ukiulik, qaratsaminik annertuumik aanaartoorsimasoq, Qaqortumi utoqqaat illuanni qaammatini immaqa arlalissuarni utaqqisussanngorpoq, tassunga suliamut akisussaaffik, Pisortaqarfinnit attuumassuteqartunit inissinneqarneq ajulermat, taamaalillunilu Inunnik Isumaginninnermut tunngasunik naammagittaalliuteqartarfimmut suliassanngortitsissutigineqarluni. Paasivarput angutip utoqqaat illuanniitinneqarnissaa qaratsimikkut aanaartoorsimasunut sungiusartarfimiitinneqarnissaanit akikinneqaralaarsuusoq. Angummut pineqartumut tunngatillugu sullissinermut Qaqortup kommuneani borgmesteri Simon Simonsen ima naliliivoq. Siullermik angutip pineqartup nakorsaataannartigut nakorsarneqalersimanera erseqqissaatigeqqaarpaa:
-Innersuussisartut killiffimmik naliliisimaneranni oqariartuuteqarnermi pineqarpoq nakorsaatitigut ikiorneqarsinaanermi killiffigisaa. Tamanna aallaavigalugu isumaqarpugut, Hammelimi qaratsamikkut innarlersimasut sungiusaqqinneqartarfiannut inissinneqarsinaanissaa pisinnaasuuppat, taamaalillunilu timimigut ineriartoqqissinnaanera qulakkeerneqarluni. Minnerunngitsumik taama inuusuttigaluni, utoqqaat akornaniinnani, immaqa imatut oqaatigalugu; ilisivimmut iliinnartutut pinnagu, kisianni ineriartoqqinnissaanut periarfissinneqarnissaa soorunami kissaatiginerpaavarput.
Taamaakkaluartorli Århusimi sianiutilerinermut qitiusumik napparsimmaavissuarmi Hammel-imi qaratsamikkut innarluuteqalersimasunut sungiusaaqqittarfimmiinneq akikitsuinnaanngilaq, tassaniinneq ulloq unnuarlu ilanngullugu 9.230 koruuneqarmat. Qaqortumilu utoqqaat illuannut inissiineq ulloq unnuarlu 928 koruuniinnaqarluni.
Taamaattumik Qaqortup kommunea Hammelimut inissiinissamut akissaqanngitsoq Simon Simonsen oqarpoq.
- Inummut ataatsimut ullormut aningaasanik taama amerlatigisunik kommune aningaasaliisinnaasutut tassa ajoraluartumik isikkoqanngilaq. Pissusissamisoortutulli isigineruarput, inatsisit peqqussutillu malillugit akisussaasut akisussaaffimminnik tigusillutik aningaasartuutissanut matussusiinissaat anguneqarsinnaajumaartoq.
Angutip atugaanut atatillugu akisussaasutut Pisortaqarfiit attuumassuteqartut inissinnerat Simon Simonsenip ajuusaarnartuutippaa.
- Tassa ajuusaarnarpoq, isumaqaraluarpunga inunnut ataasiakkaanut ajornarsiutinit taamatut annertutigisunit eqqugaasunut, inatsisit maleruagassallu ersarinnerusut pigineqartariaqartut, taamaasilluni taama pisoqartillugu, piaarnerpaamik aalajangersuinerit pilersaarusiornerillu ingerlapallattassagaluarmata. Imatut akisussaaffinnik illuatungaaniit illuatungaanut milloortutullusooq iliornani. Suliat piaarnerpaamik ingerlanneqartarnissaat kissaatiginarnerpaagami.
Suliap taama ingerlanneqarnerata angummut pineqartumut kingunissaa ajorluinnassasoq Simon Simonsen naliliivoq.
- Ajorluinnartussaavoq, takorluuinnarsinnaavarput angut inuusuttoq taanna, soorlu ilitsivimmut iliinnakkatullusooq illuni asiujartorusaassooq, tamanna soorunami akueriuminaatsukuluuvoq.
Simon Simonsen aamma oqarpoq angutip Qaqortumi utoqqaat illuanni qanoq sivisutigisumik uninngatinneqarnissaanik paasitinneqarsimanatik, taamaattumillu suliap naammagittaalliuteqartarfimmi sukkanerpaamik suliarineqarnissaa neriuutigigitsik. Periarfissanik allanik ujartuinissamut Qaqortup kommunea ingerlatseqataarusuttoq aamma erseqqissaatigaa.
