3G nunarput tamakkerlugu atuutilersinneqassaaq

TELE-POST-ip Qeqertarsuarmi Kangaatsiamilu juulip aallaqqaataani 3G atulersissavaa, taamaasillunilu illoqarfinni taakkunani qarasaasiat angallattakkat atorlugit internettertoqarsinnaalissalluni.

Kalaallit Nunaanni illoqarfinni tamani TELE-POST-imik atuisut 3G-mik aamma mobilt bredbåndimik ukioq naappat atuisinnaanngorsimassapput.

- Kalaallit Nunaanni illoqarfinni 3G-mik atuisinnaanngortoqarnissaanik ukiorpassuarni suliaqarnerput ukioq manna naammassisussanngorparput, TELE-POST-ip sanaartornermut immikkoortoqarfiani sanaartornermut pisortaq Jonas Hasselriis oqarpoq.

3G-mik ukioq manna atuisinnaanngortitsiffiit taamaalillutik tassaalerput qaammataasakkoorlugu attavillit illoqarfiit Qaanaaq, Ittoqqortoormiit kiisalu Tasiilaq, taassumalu ataani Kulusuk.

Suut tamarmik pilersaarutit malillugit ingerlagallarput, naak pinngortitaq teknikkimik ukioq manna iluangersuanartorsiortitsigaluartoq:

- Qeqertarsuarmi qerinnartuarnera ulluni makkunani immikkut assut ilungersuanarpoq. Junilli ingerlanerani kissakkiartulernissaa neriuutigaarput, Jonas Hasselriis paasissutissiivoq.

Tamakku saniatigut TELE-POST-ip 2G, tassalu mobiltelefonimik atuisinnaatitsisoq, nunaqarfimmi Kangerlummi ikkussuutissavaa. TELE-POST-ip junip aallartinneranili 2G annertusaavigaa, mobiltelefonikkut paasissutissanut sukkanerusumik attaveqartitsisoq EDGE-teknologi-mik taaguutilik nunaqarfinni arlalinni ikkussuummagu.