3D-mut isarussat seqinersiutitut atussallugit ulorianarput

Nuummi Katuami filmertartut periarfissaqarput 3D-mut isarussanik pisinissamut angerlaallugilli. Maanna meeqqat arlallit aamma isumassarsisimapput seqinersiutitut atorniarlugit, tamannali isiluttunngortitsisinnaavoq.

3D-mut isarussat taartunik isitaqaraluarlutik seqinersiutitut atussallugit naleqqutinngilluinnarput. Tassami seqernup qinngornerinut UV-nut illersuutitaqanngillat.

- Pitsaanerpaaffiani silami iluaqutaanavianngillat, ajornerpaaffianilu isit suleqatigiissinnaanerat innarlersinnaavaat, Rigshospitale-mi isinut immikkoortoqarfimmi  professori Jens Folke Kiilgaard KNR-imut taama oqarpoq.

Isit suleqatigiissinnaanerat innarleraangat ilaatigut innarlerneqartarput atuarsinnaaneq, timip makittaritsinniarnera kiisalu ungasissutsit nalilersinnaanerat.

Taamaammat isit pillugit ilisimatuup inassutaa ersarippoq: 3D-mut isarussat seqinersiutitut atugassaanngillat.