3D-mik Nuummiut filmertalissapput
Nuummi Kulturikkut illorsuup Katuap filmertarfia digitalinngortinneqassaaq, 3dimensionalimik, tassa piviusorpalaartunik, sapaatip-akunneri marlussuit qaangiuppata filmertoqarsinnaalissalluni, tamannalu Nunatsinni aatsaavik misilinneqassaaq.
Immikkorluinnaq ittunik isarusserluni taama filmertoqartarpoq - filmigaq piviusorsiorpalaavittarpoq - soorluluunniit nammineq filmimi inuttaalluni.
Katuami nutaavimmik atortutaarnissamut Royal Arctic Line tukkusaarluni aningaasaliisuuvoq, atortussap, Sony-p nutaaliaanerpaartaata pitsaanerpaartaatalu Nunatsinnut assartorneqarnera aamma akilerlugu.
Atortoq nutaaq digitaliusoq sisamanngornermi maajip 19-iani atoqqaartinneqassaaq, filmi "Pirates of the carribbean i ukendt farvand", nunarsuaq tamakkerlugu takuteqqaarneqartussaq, takutinneqalerpat.
Bilitsip akiata saniatigut isarussat tredimensionallimik filmernermi atugassat 15 koruuninik akillit pisiarineqassapput, tassa piviusorpalaartumik isiginnaarniaraanni, filmimi pingaarnertut inuttaavoq isiginnaartitsisartoq tusaamasaq, Johnnye Depp.
Katuami filmertarfimmi 3D-mik tulliani filmertitsisoqalerpat isarussat soorunami atoqqinneqarsinnaassapput.
Royal Arctic Line aningaasaliinermini ataatsimik piumasaqaateqarsimavoq, imaattumik:
"Meeqqat angerlarsimaffiup avataanut inissitat Katuamit akeqanngitsumik ukiumut ataasiarlutik filmeriartinneqartassapput". Tamannalu Katuamit akuersaarneqarluarpoq.