Ilisimatuut Israelimeersut 3D atorlugu uummatiliaq saqqummersikkaat
Inuup uummataa assilillugu suliaq ”nakorsaatilerinermi pingaaruteqarluinnartutut” oqaatigineqarpoq taannalu iluatsilluartumik uummatiliisarnermut pitsanngorsaataasinnaavoq.
- Uummat kaniinap uummataatut angitigivoq. Cellelimmik, taqqalimmikk, uummatillu sulluusaanik ilaqartumik aatsaat siullerpaamik iluitsumik uummatiliortoqarpoq, suliniummi pisortaq, Tal Dvir oqarpoq.
- 3D printeri atorlugu siusinnerusukkut uummatik sannaat sananeqareernikuuvoq, cellelli taqallu taamani amigaataapput, Tal Dvir oqarpoq.
Taassuma 3D atorlugu uummatiliap inunnut atorneqarsinnaalernissaanut periariivinnissaanut aqqummi aporfissat suli amerlanerarpai.
3D atorlugu uummatiliaq, kirsebæritut angitigisoq, Tel Avivimi ilisimatusarfimmi tusagassiortunut takutinneqarpoq. Ilisimatuut suliaqarnerat atuagassiami, Advanced Sciencemi saqqummersinneqarpoq.
3D atorlugu uummatiliap uummativittut ingerlalernissaata ilinniarnissaa suliassami tullinnguuppoq. Tamanna tikinneqaruni uumasunut misileraatinut misiliutigineqassasoq, Dvirip oqaatigaa.
- Immaqa ukiut qulit qaangiuppata nunarsuatsinni napparsimmavissuarni 3D atorlugu timip atortuinik sanasartunik printereqalissaaq, taamalu suleriaaseqarnerit nalinginnaasunngoriartussallutik, Dvir oqarpoq.
Napparsimmaviilli timip atortuini ajornaannerusut aallarniutigissagaat Dvirip eqqoriarpaa.