3,9-mik sakkortutigisumik nuna sajuppoq
Arfininngormat Sisimiuni nuna sajummat, richterip uuttuutaa malillugu, nunap sajunnerata sakkortussusaa 3,9-mik sakkortussuseqartoq, Danmarkimi Kalaallit Nunaannilu ujarassiuutut misissuiffimmi GEUS-mi nunap sajuttarneranut ilisimatooq Peter Foss oqarpoq.
- Sisimiuni Nunap sajunnera uuttuut ataasiinnaagallartoq malillugu 3,9-mik sakkortussuseqarpoq. Uuttuut ataasiinnaq atoratsigu kisitsit missingersuutaannaavoq.
Nuna taama sakkukitsigisumik sajukkaangat, glassit nipiliortarput igalaallu aalasinnaasarlutik, kisiannili iikkat nunani allanisuulli qupititerneq ajorput, Danmarkimi Kalaallit Nunaannilu ujarassiuutut misissuiffimmi GEUS-mi nunap sajuttarneranut Peter Foss oqarpoq.
- Kalaallit Nunaat nunap ataatigut nunarsuup qalipaa, litosfærebladimik taaneqartartup nalaaniippoq, taannalu blade angisoorujussuulluni. Blade taanna nunap qaavatigut ingerlaartuartuuvoq, aporaaffeqaleraangallu nuna sajussinnaasarluni. Litosfærebladimik taaneqartartut killeqarfiisa nalaaniittut nunat, sakkortunermik nunaminnik sajutsitsisarput, Islandilu killeqarfiup nalaaniimmat, tassani nuna sakkortunerusumik sajuttarpoq, Peter Foss naggasiivoq.
Kalaallit nunaanni nunap ataatigut nunarsuup qalipaata ingerlaartup aporaannerani killeqarfik ungaseqimmat, Tyrkiiami nunap sajorujussuarsinnaanerasuulli, Kalaallit Nunaanni nunamik sajuttoqarsinnaanngitsoq, Danmarkimi Kalaallit Nunaannilu ujarassiuutut misissuiffimmi GEUS-mi nunap sajuttarneranut ilisimatooq Peter Foss oqarpoq.
