38-nik ukiulik Islandimi toqutsisutut unnerluunneqartoq
Angut arnap angerlarsimaffiani Reykjavikkimiittumi septembarip 21-ani ukioq manna arnamut perluffigisaminut, Sanita Braunamut arlaleriarluni arnaq niaquatigut puiaasanik igalaaminiusumik ikuallattumullu qamitsissummik, 10 kiilumik oqimaassuseqartumik anaaleraasimasutut unnerluutigineqarpoq.
Islandimi tusagassiorfiit naapertorlugit arnap puiaasanik igalaaminiusumik ikuallattumullu qamitsissummik niaqqumigut qassiunersunik ilisimaneqanngitsunik anaatarneqarnermini ikilerneqarnini toqqutigai.
Angut 38-nik ukiulik, Yemenimeersoq unnerluutigineqartoq pisuusutut eqqartuunneqassaguni ukiuni minnerpaani tallimani sivisunerpaamillu inuunermi sinnera parnaarussaasinnaavoq.
Sanita Brauna Letlandimiusut innuttaassuseqarpoq. Sanitap angajoqqaavisa meeraasalu pingasut tamarmik angut 38-nik ukiulik 3 millionit islandimiut koruuniinik taarsiisussanngorlugu eqqartuutitinniarpaat.
Toqutsineq aalassassutaasoq
Islandimi inuiaqatigiit nunarsuarmi eqqissisimanerpaat ilaattut ilisimaneqartut ukioq manna arlaleriarlutik toqutsinernik avaanngunartunik eqqorneqarput. Arnat inuusuttoq, Birna Brjánsdóttir Reykjavikkimi illoqarfissioreertilluni januaarip qaammataani tammarpoq. Sapaatip akunnerani ataatsimi ujaasingaatsiartoqareersoq, arnap timaa islandimi illoqarfiit pingaarnersaata avataani sissami nassaarineqarpoq.
AAMMA ATUARUK Toqutsisimasutut pisuutinneqartup eqqartuussinerup inernera suliareqqitassanngortippaa
Piffissap sivikitsup ingerlanerani kalaalleq, Thomas Møller Olsen tigusarineqarpoq. Taanna Birna Brjánsdóttirimut toqutsisutut hashimillu angiortumik eqqusseriartutut pisuutinneqarluni ukiuni 19-ini parnaarussaasussanngorlugu septembarimi eqqartuunneqarpoq. Thomas Møller Olsenip eqqartuussiviup aalajangiinera eqqartuussisuuneqarfimmut suliassanngorteqqippaa.
AAMMA ATUARUK Birnamik toqutsineq ikiaroornartulerinerlu ukiuni 19-ini parnaarussaassutigissagaa
Islandimi innuttaasut 330.000-iusut decembarip pingajuani toqutsisoqarneranik eqqugaaqqipput. Tassani albaniamiu, Klevis Sula angummik Austurvöllurimi Reyklavikkimiittumi ikiorniakkaminik toqunneqarpoq.
Pinerluuteqartoq tigusarineqartoq, islandimiut nutaarsiassaqartitsivii allapput.