37-inik ukiulik tilluuttartumut persuttaaqataasoq

decembarip 14-at 2006 10:39

Tilluuttartuusimasup Johnny Bredahlip sapaatiummat ullaakkut persuttarneqarneranut atatillugu angut 37-inik ukiulik inatsit tunngaviusoq naapertorlugu ullumi killisiorneqarpoq.

Taassuma angutit allat marluk peqatigalugit persuttaaqataasimanini killisiorneqaatigaa.

Killisiuineq ullup ingerlanerani piffissamut kingusinnerusumut kinguartinneqarsimagaluarpoq, 37-inik ukiulik nunatsinneersoq danskisut paasilluarsinnaananilu misigissutsimigut nanertisimaqimmat.

Maannali killisiorneqareersoq oqaatigineqarpoq ullunilu pingasuni tigummineqartussanngortitaavoq.

Unnerluussisut naapertorlugit oqaatigineqarpoq angutip allat marluk aamma parnaarunneqareersimasut peqatigalugit Johnny Bredahl sapaatiummat ullaakkut puiaasamik niaquatigut miloriarlugu persuttarlugulu kiinaatigut isimmittalersimagaat.

Kalaallit persuttaaqataasut allat marluk parnaarunneqarput aatsaallu ukiortaareerpat anisinneqassallutik.

Taakku marluullutik pisuunnginnerarsimapput.