Misiligutinut 35-nut akissutit: Tunillatsittoqarsimanngilaq
- Misiligutit kingulliit tunillatsissimasunik nassaarineqarmatali sivitsormat nunatsinni tunillatsissimasut amerlavallaannginnerat qularutigivallaarunnaarparput. Taamaattorli qulakkiivissinnaanngilarput, kisianni misiligutinik akissuteqaatini tunillatsittoqarsimannginnera nutaarsiassatsialaavoq, nunatsinni nakorsaaneq Henrik L. Hansen oqarpoq.
Akissutinik allanik aqagu tallimanngornermi tigusaqartoqarnissaa qularnartoq nalunaarutigineqarpoq, Kalaallit Nunaanniimmi misiligutinik misissuqqissaannginnissartik, Statens Serum Institutip nalunaarutigaa.
Sisamanngornermut tallimanngornermullu inerniliussat, tusagassiortunik arfininngorpat apriilip ulluisa aqqarnanni ualikkut nalunaqutaq ataatsimut katersuutsitsinermi aatsaat saqqummiunneqarumaarput.
Inuit misiligutissanik apriilip ulluisa arfineq-pingajuat ilanngullugu tigusiffigineqarsimasut katillugit 844-upput, taakkunannga inuit 782-it tunillatsissimanatik, inuillu aqqanillit tunillatsissimasut.
Misiligutinut 51-inut akissutissat utaqqimaarneqarput. Nunatsinni inuit Covid-19-imik tunillatsissimasut tamarmik maannakkut peqqissisutut nalunaarutigineqarput.
