35-inik ukiulik toqutsisimasutut unnerluunneqarpoq

Tasiilami politiit ippassaq aalajangerput angut 35-nik ukiulik sapaatip akunnerini sisamani tigummigallagassanngortinneqassasoq. Angutip taassuma angut inooqanni 43-nik ukiulik ippassaq unnuakkut savissuarmik 13-eriarlugu kapoorsimavaa, toqqutigisaanik.

35-nik ukiulik pinngitsuunerarpoq, ukiutoqqalli unnuaani qanoq pisoqarsimanersoq eqqaamasaqarfiginnginnerarlugu. Politiit ulluni qaninnerni tamanna paasisaqarfisinnaassallugu neriuutigaat, nakorsanik toqusunik misissuisartunik pinerluttaalisitsisunillu Danmarkimiit ilaatigut ikiorteqassallutik.

Danskeq 43-nik ukiulik illumi attartorsimasamini toqungasoq ippassaq ullaakkut nassaarineqarpoq. Toqutsisup toqutsereernermi kingorna illu ikuallatsinniarlugu eqqarsarsimagaluarpoq.

Politiit naapertorlugit 35-nik ukiulik ikuallatsitsinissamut piareersaasimagaluarpoq, ikuallajasut spritimik acetonimillu kuerariarlugit, qerinaveeqqummik natersuaq kuerariarlugu ikuallatsitseriaraluarsimalluni, tamannali iluatsissimanngilaa.

Tasiilami politeeqarfiup pisortaa, Kristian Síngertât, naapertorlugu, angut 35-inik ukiulik eqqumiitsumik pissusilersortoq malugigamikku tigusarisimavaat.

- Toqutsineq puuallarujussuarnikkut pisimassasoq ilimagaarput, Tasiilami politeeqarfimmi pisortaq oqarpoq.