35-inik ukiulik ikiaroornartulerisoq pineqaatissinneqartoq
Angut 35-inik ukiulik Sisimiuneersoq ukioq manna aggustimi ikiaroornartumik 3,9 kilomik eqqussisimasutut Kujataata Eqqartuussiviani ukiuni marlunni isertitsivimmiittussanngorluni pineqaatissinneqartoq politiit tusagassiuutinut nalunaarutigaat.
Allattoq Anton Gundersen Lihn, Mads Pedersen
novembarip 02-at 2016 15:44
Ikiaroornartup saniatigut aningaasat 178.000 koruunit aamma arsaarinnissutigineqarsimapput.
Angutip mittarfimmi akitsuuserisunit politiinillu misissorneqarnerani hashimik 3,9 kilomik kuffertimini toqqortaqartoq paasineqarpoq.
Angut 35-inik ukiulik 150.000 koruunit sinnerlugit ikiaroornartumik tuniniaanermini isertitarisimallugit politiit paasiniaanerini nassuersimavoq.
Aningaasallu taakku atorlugit ikiaroornartumik 4 kilomik Nunatsinnut eqqussassaminik pisisimalluni aamma nassuerutigaa.
Angut pinerluttulerinermut inatsit tunngavigalugu pineqaatissinneqarnini akueraa, taamaalilluni suliap ingerlarnga akilertussanngorpaa ukiunilu marlunni isertitsivimmiittussanngorluni.
