30 tonsimik tamussertartut
Misissuinerni paasisat ilisimatusarneq pillugu tuluit atuagassiaanni ”The journal of Experimental Biology”-mi saqqummiunneqarput.
Pinngortitaleriffimmi ilisimartusartoq Malene J. Simon Aarhus Universitetimi ilisimatooq Peter T. Madsen aamma University of St. Andrewsimi ilisimatooq Mark Johnson suleqatigalugit arferit ingerlaartarnerat ilaatigullu uumasuaqqanik kigunnut eqqaanartunik neriniartillutik "qitittarnerat" pillugu aamma misissuivoq.
Arferit sukkatseriasaartarput sekundimut 3-4 meterik sukkassuseqalerlutik, taamalu ingerlanerminni qanertik ammartarpaat imaq 30 tonsip missaa aalisagaarartalik imertarlugu allerorsuartik alleqqumiit qalatsimut takissusilik tasisuaartoq immertarlugu.
Qipoqqaat qanertik immamik ulikkaartoq sekundimut 1 meterimik sukkassuseqarlutik ingerlattarpaat, naak ingerlanniarnera kinertorujussuanngortaraluartoq.
Qanertik matugaangassuk soqqaani aalisagaaqqat unerartarput taamalu sarpissorlutik sukkatseriarlutik qarngup immeqqinnissaanut piareertarlutik.
Taamatut neriniarnermi nalunaaquttap akunnerata ingerlanerani imaq 1.000 tons qipoqqaat imertarpaat.
Paasisat nutaat atorlugit ilisimatuut naatsorsuisinnaalerput arferit neriniarnerminni issittumi uumasoqatigiinnut qanoq sunniuteqartarnerannik, Pinngortitaleriffimmiit nalunaarput.
