Unnerluussisussaatitaasut oqarnerat naapertorlugu toqutsineq siorna septembarip 29-ani pivoq.Assi: KNR

28-nik ukiulik piffissami killiligaanngitsumi isumagisassanngortinneqartoq

Angut 28-nik ukiulik toqutsisimasutut toqungasullu timaanut iliuusissaanngitsumik iliuuseqarsimasutut Ilulissani Qaasuitsup Eqqartuussisoqarfianit pisuutinneqarluni eqqartuunneqarpoq.

Ilulissani peqqarniitsumik toqutsineq pillugu eqqartuussivimmi suliaq tassa 28-nik ukiullip Tittus Hansenip 24-nik ukiulimmik, Maassannguaq Dalagarimik siorna septembarip ulluisa 29-anni toqutsisimasutut unnerluutigineqarnera aalajangiiffigineqarpoq,

Taanna 24-nik ukiulimmik toqutsinerup kingorna agguisimasutut aamma unnerluutigineqarpoq.

Piffissami killiligaanngitsumi isumagisassanngortinneqarnissaa eqqartuussivimmit aalajangerneqarpoq.

Illersuisup unnerluutigineqartullu eqqartuussut tiguaat unnerluussisussaatitaasullu aamma taamaaliorput.

- Tittus Hansenip Maassannguaq Dalagerimik toqutsisimanissaa tamatumalu kingorna agguisimanissaa eqqartuussivimmit qularutigineqanngilaq. Tamanna peqqarniillunilu naakkittaanneruvoq, eqqartuussisoq, Eleonora Steenholdt Mørch oqarpoq.

Oqarasuaatikkut oqaloqatigiinneq ilisimannittunit ilalerneqartoq

Oqarasuaatikkut oqaluunnerup eqqartuussivimmi ippassaq tusarnaartinneqarluni uppernarsaatigineqarnera eqqartuussivimmit tunngavilersuutigineqarpoq - oqaloqatigiinneq taanna ilisimannittutut nassuiaateqartoqarneranit ilalerneqarpoq.

Eqqartuussivimmi suliaq Qaasuitsup Eqqartuussiveqarfiani Ilulissani sapaatit akunnerani matumani ataasinngornermi, marlunngornermi pingasunngornermilu sammineqarpoq.

Taamaammat KNR-ip eqqartuunneqartup aqqa saqqummersippaa:
 

Nunatsinni toqutsinerit peqqarniinnerpaat ilaat pineqarpoq.


Unnerluutigineqartoq Pinerluttulerinermi inatsimmi isumagisassanngortitsineq sakkortunerpaaq malillugu eqqartuunneqarpoq.
 

Politiit taassuma aqqanik siorna oktobarip ulluisa aqqaneq-aappaani saqqummersitsipput. 

Unnerluussisussaatitaasup Pinerluttulerinermi inatsimmi paragraf 161 malillugu piffissami killiligaanngitsumi isumagisassanngortitsisoqarnissaa anguniarpaa.

Illersuisup ukiunik qulingiluanik pineqaatissiisoqarnissaa tunngavilersorpaa.

Unnerluussisussaatitaasut oqarnerat naapertorlugu toqutsineq siorna septembarip ulluisa 29-anni pivoq. Tamannalu unnerluutigineqartup inaani pisimaneragaalluni.

Inuup niuanik Ilulissani eqqakkanik ikuallaavimmi eqqakkat akornanni oktobarip ulluisa aappaani nassaartoqarpoq.

AAMMA ATUARUK 28-nik ukiullip inuarsimanini agguisimaninilu nassuerutigigaa

Ullualuit qaangiuttut inuup niaqua nassaarineqarpoq.

Tittus Hansen najukkami oktobarip ulluisa arfineq-pingajuanni tigusarineqarpoq, tamatumalu kingornali tigummigallagaalluni.

Unnerluutigineqartoq eqqartuussivimmi suliaq ataasinngornermi aallartimmalli pinngitsuunerpoq, taassumali toqutsineq kingornalu agguineq nipip immiussap eqqartuussivimmi tusarnaartinneqarnerata kingorna nassuerutigai, immiussami angutit allat marluk tusaaneqarsinnaapput tassanilu unnerluutigineqartup toqutsineq agguinerlu nassuerutigalugit immikkualuttortalersorlugu oqaluttuarai.

Peqqarniitsumik saassussinermi pinngitsuutinneqartoq

Tittus Hansen biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

Aamma Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip tallimaani aamma peqqarniitsumik nakuusersimasututut aamma unnerluutigineqarpoq.

Taassuma taakku tamarmik nassuerutigai - eqqartuussiviulli biilernermut allagartaqarani biilersimasutut kiisalu Ilulissani peqqarniitsumik nakuusersimasutut pinngitsuutippaa. Eqqartuussiviummi unnerluussisussaatitaasut taakkununnga uppernarsaataat naammassorinngilai.

Angut Nuummi pineqaatissinneqarsimasunut inissiisarfimmi nakuusersimasutut eqqartuussiviup ilaatigut eqqartuuppaa.

- Naak ilaani pinngitsuutinneqaraluartoq tamanna pissutsinut sakkukinnerulersitsinngilaq, eqqartuussivik piffissami killiligaanngitsumi isumagisassanngortitsisoqarnerani oqarpoq.

Tittus Hansenilu Maassannguaq Dalagerimut katillugit 300.000 koruuninik aamma taarsiisussanngortinneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl