Eqqartuussiviup angut niviarsiaqqamik 15-inik ukiulimmik pisuni qassiiusuni pinngitsaaliilluni atornerluisimasutut atornerlueriarsimasutullu aamma eqqartuuppaa.Assi: KNR

28-nik ukiulik nakuusersimasutut pinngitsaaliillunilu atornerluisimasutut ilaatigut eqqartuunneqartoq

Nunatta Eqqartuussisuuneqarfiata angummut 28-nik ukiulimmut tunngatillugu eqqartuussivimmi suliarujussuaq suliassanngorteqqinneqarsimasoq ulluni sisamani suliaraa.

Nunatta Eqqartuussisuuneqarfiata angut 28-nik ukiulik Maniitsumeersoq piffissami killiligaanngitsumi tigummineqartussanngortippaa.

Angut inunnut pisortallu suliffeqarfiini sulisunut nakuusernermut atatillugu pisuni qassiiusuni pisuutinneqarluni eqqartuunneqarpoq.

Eqqartuussiviup angut niviarsiaqqamik 15-inik ukiulimmik pisuni qassiiusuni pinngitsaaliilluni atornerluisimasutut atornerlueriarsimasutullu aamma eqqartuuppaa.

Nunatta Eqqartuussisuuneqarfiata unnerluunneqartup niviarsiaqqamut sioorasaareqattaartarsimanera nakuusikulasimaneralu niviarsiaqqallu atoqatiginngippani nakuuserfiginissaanik siorasaartarsimanera pingaartuutippaa.

Angut niviarsiaqqamik allamik piffissami tassani 13-inik ukioqartumik atoqateqarsimasut aamma eqqartuunneqarpoq.

Toqutsinissamik sioorasaarineq

Angutip niviarsiaqqamut taamani 15-inik ukioqartumut sioorasaarisarnerata saniatigut unnerluutigineqartup niviarsiaqqap ilaqutai inuillu allat naapillugit oqarasuaatikkullu aamma sioorasaartarsimavai. Tamanna angutip pinerluuteqarsimasunut inissiisarfimmi tigummigallarneqarnerata nalaani ilaatigut pivoq.

Angut pisimasuni katillugit arfineq marluusuni piumasaminik iliortoqanngippat inunnut assigiinngitsunut unataanissamik, toqutsinissamik aamma inummut namminermut paasissutissanik siammarterinissamik sioorasaaruteqarneq pillugu eqqartuussaavoq.

Angut Nunatta Eqqartuussisuuneqarfianit pisimasuni 20-ni tamani matumani sakkortuumik nakuusernermi qassiiusuni, inunnut assigiinngitsunut sioorasaarinermi meeqqanullu kinguaassiutitigut naapertuilluanngitsuliornerni qassiiusuni unnerluussutigineqartuni pisuutinneqarluni eqqartuunneqarpoq.

- Suliaq inuppassuarnut ilaatigut meeqqanut unnerluutigineqartumit nuanninngilluinnartumik iliuuseqarfigineqarsimasunut annertuumik kingunerluuteqartitsivoq. Taamaammat suliap kiisami naammassineqarnera taakku sinnerlugit nuannaarutigingaatsiarpara, unnerluussisussaatitaasoq, Emil Maegaard-Hoffmann oqarpoq.

Eqqartuussut eqqartuussiviup eqqartuussutaa assigigaa

Suliaq Eqqartuussiveqarfiup Sermersuup ukioq manna siusinnerusukkut isumagaa, tassani angut unnerluussissummi allassimasunit pisimasunit 23-nit 18-ini pisuutinneqarluni eqqartuunneqarpoq, piffissamilu killiligaanngitsumi tigummineqartussanngortinneqarluni.

Eqqartuussut ilungersunarluinnartoq angut taassumalu illersuisua isumaqarput. Taamaammat eqqartuussiviup aalajangernera nunatta eqqartuussivianut suliassanngortippaat, tassanilu ukiuni pingasunit sisamanut pinerluuteqarsimasunut inissiisarfimmiitsitsisoqarnissaa piumasaralugu.

Nunattali eqqartuussisuuneqarfiata angut eqqartuussiviup aalajangerneratulli eqqartuuppaa: tassa killiligaanngitsumik tigummineqartussanngorlugu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat