25-nik ukiulik sakkortuumik persuttagaasoq
Angut qallunaaq 25-nik ukiulik Nuummi katersortarfiup eqqaani majuartarfiit eqqaanni, ullaassaq nalunaaqutaq sisamat missaanni persuttarneqarnermi kingorna qingaa najungasuilu arlallit napineqarput. Persuttarneqartoq Dronning Ingridip Napparsimavissuani uninngatinneqarpoq.
Angutip saassunneqarnerani oqarasuaata angallattagaq, aningaasivialu 1.000 koruunit missaannik imaqartoq tillinneqarput, saassunneqartup oqaluttuaa naapertorlugu saassussisut katillutik inuit sisamaasimapput.
Saassunneqartoq radiup qaqqaani angerlarsimaffiit ilaanniit nangigiareernermi kingorna angerlartilluni saassunneqarpoq, saassunneqartullu oqaluttuaa naapertorlugu, tummeqqat naqqanni angut maluginialersimavaa. Kingornalu tunuminiit angummit tigutissimalluni, taamaasisoqareermat angutit pingasut aggersimapput angullu tukkalersimavaat tilluarlugulu.
Saassusissut ilaat kalaaleq 20-t 25-llu akornanni ukioqassangatinneqarpoq, 180 centimeterillu missaannik angissuseqassangatinneqarluni.
Angut taanna qernertumik kavaajaqarsimavoq qarleqarlunilu jogginnginik, teqqialimmillu kasketimik nasaqarluni.
Angut ujarneqartoq ilaminit ukioqqortunerulaassangatinneqarpoq, saassusseqataasut sinneri angutit pingasut 15-iniit 18-it tungaannut ukioqassangatinneqarput. Taakkua tamarmik kavaajaasanik nasartalinnik atorsimapput, narsartaannillu kiinnatik assersorsimallugit.
Angut saassunneqartoq politiinut oqaluttuarpoq, saassussisut utoqqaanersarigunagaat, saassussineq sioqqullugu illoqarfiup qeqqani takusimallugu, taamaattumillu ilisarisinnaassallugu. Angut pineqartoq saassussinermi peqqarniinnersaasimavoq, isimmittaalluni tilluaallunilu pisimagami.
Ullaassaq nalunaaqutaq sisamat missaanni saassussisimanermut tunngatillugu takunnissimasinnaasunik, Nuummi politiit innuttaasunik ikiortissarsiorlutik saaffiginnipput.
Nuummi politiit oqarasuaataasa normoraat 32 14 48