25-liinersiornermi inuppassuit

oktobarip 05-at 2004 07:58

Nuup timmisartoqarfiata, timmisartullu Dash 7-init ukiunik 25-inngortorsiornerinut atatillugu Air Greenlandip Mittarfeqarfiillu Nuummi timmisartoqarfimmi takutitsinerinut, inuit 2000-ingajaat sapaammi oktobarip pingajuanni takuniaasimasut, Air Greenlandip tuniniaanermut pisortaa Jesper Kunuk Egede unnersiorpoq.

Timmisartut Dash 7- it timmisartoqarfiullu nalliuttorsiorneranut atatillugu meeqqat ilaqutaallu timmisartoqarfimmi atortunik, soorlu biilersuarnik ikuallatuulernermi atorneqartartunik timmisartunillu assigiinngitsunik ulluinnarni qanimut takuneq ajukkatsinnik takuniaasinneqarput.

Aamma innuttaasunut nuannaarutaasumik Nuuk eqqaalu qulaavaallugit Dash 7-imik timmisartornissamut periarfissiisoqarpoq atorluarneqaqisumik. Jesper Kunuk Egedellu oqaatigaa timmisartumut ilaaniartorpassuit billitsit ingerlaannangajak nungussimagaat. Tamaattumik innuttaasut nuannaarutigeqisaannik akikitsumik taamatut timmisartortitseqqinnissaq maanna eqqarsaatigineqartoq Jesper Kunuk Egede oqarpoq.

Dash 7-imik sivisunngikkaluartumik timmisartortitseqattaarnermit iluanaarutit katillugit 30.000 kroneusut Nuummi meeqqat ornittagassaannut  tunniunneqassapput.

Nuummi timmisartoqarfiup nalliuttorsiornera naalakkersuisuni ilaasoratmit jens Napaattuummit ammarneqarpoq, taassumalu oqalugiarnermini Nuup timmisartoqarfiata tallineqarsinnaanera ilannguppaa. Jens Napaattooq oqarpoq Nuup timmisartoqarfia Nuummiinnaanngitsoq aammali sinerissap sinnera eqqarsaatigalugu silaannakkut angallannerup ineriartortinneqarnerani siunissami pingaaruteqartussaasoq.