Ukiuni 25-ni erngup nukissiuteqarneq nalliuttorsiutigigaat
Taamaammat Naalakkersuisut Nukissiorfiillu tamanna nalliuttorsiutigerusuppaat. Tamanna ullup nalliussivissap, tassa oktobarip aallaqqaataata tungaanut, assigiinngitsunik aaqqissuussinikkut unammititsinernillu nalliuttorsiutigineqassaaq.
Ataavartumillu nukissiuteqarniarneq isumatsialaasimasoq Inuussutissarsiornermut Nukissiuuteqarnermullu Naalakkersuisup, Aqqalu Jerimiassenip oqaatigaa:
- Erngup nukinganik nukissiornermut aningaasaliinerit tamatsinnut avatangiisitigut aningaasaqarnikkullu assut iluaqutaasimanerat paasinarsisimavoq.
Siunnerfigisarsi taanna ingerlatiinnarneqassasoq erngullu nukinga ataavartoq suli atorneqarnerulissasoq, Aqqalu Jerimiassenip erseqqissaatigaa.
AAMMA ATUARUK Erngup nukinga nunatsinnut aningaasaliisussanut ussassaarutaassasoq
Utoqqarmiut Kangerluarsunnguani nukissiorfik Nuummut innaallagiamik kiassarnermillu 1993-imiilli pilersuilerpoq. Nukiullu Nuummi innuttaasunit atorneqartup 99 procentia nukimmit ataavartumit pinngortuuvoq.
Nukik ataavartoq 2030-mi sumi tamani atorneqalissasoq Naalakkersuisut anguniagaraat.
- Tamanna erngup nukinganut aammali seqerngup anorillu nukinginut atuuppoq, Inuussutissarsiornermut Nukissiuuteqarnermullu Naalakkersuisoq oqarpoq.
Nuummi Katersugaasivimmi ukiunik 25-nngortorsiorneq marlunngorpat tulliani aggustip 28-anni allarnerneqassaaq, tassani Utoqqarmiut Kangerluarsunnguani nukissiorfik pillugu isiginnaagassiaq naatsoq isiginnaartinneqassalluni.
Nalliuttorsiutiginninneq Nukissiorfiit nittartagaatigut www.nukissiorfiit.gl-ikkut Nukissiorfiillu Facebookimi qupperneratigut nunatsinni sumiiffinni tamani malinnaavigineqarsinnaavoq.
