Angut 25-nik ukiulik tigusarineqartoq imigassartorsimatillunilu biilinik ingerlatsisimasutut unnerluutigineqassalluni
Nuummi arnaq biilinit pisiniarfiup Akikip Nuka Din Tøjmandillu akornanni sapaammi unnuakkut nalunaaqutaq ataatsimut qiteqqunnerata missaani aporneqarpoq, Kalaallit Nunaannilu Politiit tassunga atatillugu angummik 25-mik ukiulimmik tigusarinnipput.
Arnaq biilinit aporneqarmat 1 kilometeri sinnerlugu kalinneqarpoq, biilinillu aqutsisoq Nuussuarmut aqqutaanut anngutereerluni aatsaat unippoq, ambulancinullu nammineq sianerluni.
AAMMA ATUARUK Politiit apuisoqarnerani takunnissimasunik ujaasipput
Kalaallit Nunaanni Politiit pigaartuisa ilaat Julie Senderovitz Bendtsen KNR-imut taama oqarpoq.
Arnaq aporneqartoq peruluppoq, piaarnerpaamillu Danmarkiliaanneqassasoq taassuma oqaatigaa.
25-nik ukiulik imigassartorsimatilluni biilinik ingerlatsisimasutut, mianersuaalliorlunilu inummik allamik timaatigut peqqissusaanullu annertuumik ajoqusiisimasutut unnerluutigineqassaaq.
Politiit sapaammi unnuakkut apuisoqarneranik takunnissimasinnaasunik suli attaveqarfigineqarusupput.
Kalaallit Nunaanni Politiit oqarasuaataasa normoraat 70 14 48.