249,6 millionit koruunit. Soraarnerussutisiassanut ileqqaarutit taama amerleriartigipput

249,6 millionit koruunit. Tassa Sulinermik Inuussutissarsiuteqartut Soraarnerussutisiaqalernissamut Aningaasaateqarfiata SISA-p ilaasortaasa soraarnerussutisiassanut ileqqaarutaasa siorna 2017-imi amerleriaataat.
SISA-p pisortaa Søren Schock Petersen
Allattoq Mads Lynge
marsip 23-at 2018 07:56

SISA tusagassiutinut taama nalunaaruteqarpoq.

SISAp-p oqaluttuarisaanerani pissarsiat aatsaat taama amerlatigisut soraarnerussutisiassanut aningaasaateqarfiup nalunaarutigaa.

- Tamassuma assigaa ilaasortat ileqqaarutaasa ukioq tamaat agguaqatigiissillugu 9 procentimik erniaqarnerat. Erniat taakku sumi tamani pissarsiarineqarneq ajorput, soraarnerussutisiaqalernissamullu aningaasaateqarfinnut allanut sanilliullugu angusarissaarneroqaagut, SISA-p pisortaanera Søren Schock Petersen oqarpoq.

SIK-p isumaqatigiissutai malillugit sulisut kisimik 2016-ip naanissaata tungaanut ilaasortanngorsinnaapput, Kalaallit Nunaannili suliffeqarfiit sulisuminnut tamarmiusunut soaarnerussutisiassanik aaqqissuussineq pillugu isumaqatigiissuteqarnissaannut SISA-mmit 2016-ip naanerani ammaaffigineqarput.

SISA-mmi ilaasortat siorna amerleriarput, ilaasortallu soraarnerussutisiassanut ileqqaarutaat taamaasillutik aamma amerleriarlutik.

 

 

Aamma atuaruk