24-nik ukiulik periarfeerunneqartoq
Politiit 24-nik ukiulimmik Sarfannguamit Sisimiunut umiatsiaararluni tallimanngormat periarfeerunneqartumik ujaasinertik taamaatiikkaat, politiit tusagassiuutinut nalunaarummi allapput.
Allattoq Jonas Fievé
Nutserisoq Ivik Kristiansen
Umiatsiaaqqamik Sarfannguanit Sisimiunut kangisimmik sakkortuumik anorlertillugu aallartoqarsimasoq, politiinut tallimanngormat ullaassakkut pingasunngulersoq nalunaarutigineqarpoq.
Angut inuusuttoq politiinit, innuttaasuniillu kilisaatinit umiatsiaaqqaniillu namminneq kajumissutsinimmik ujaaseqataasunit ujarneqarpoq, qulimiguulillu s-61 atorlugu arfininngormat ujaasisoqarluni.
Politiilli kangerlummi Amerlummi, Kangerluarsuk Ungallermit Saqqap Siorarliinut sinerissamiillu sømilinik 40-nik avammut ujaasereerlutik ujaasinertik arfininngornermi taarsilernerani taamaatippaat.