Assi: Marti Photographe

2,3 millionit missaat kulturikkut suliniutinut agguaanneqartut

Kultureqarnermut naalakkersuisoq, Ane Lone Bagger, kulturikkut suliniutinut ukioq manna naggataarutaasumik aningaasanik agguaassivoq.

Aningaasat suliniutinut assigiinngitsupilussuarnut 20-nut agguaanneqarput.
 
Tassaallutik isiginnaartitsissutit, tusarnaartitsinerit, qitimmik takutitsinerit atuakkiallu nutaat, 2019-imi qilanaarisinnaasagut.
 
Rappertartoq nuannarineqarluartoq Josef Tarrak Petrussen isiginnaartitsinerup tungaatigut misiliiniarpoq. Taanna Pipaluk Kreutzmann Jørgensen peqatigalugu ataataaneq pillugu isiginnaartitsissummik nipilersornertalimmik suliaqarniarpoq. Ataataqanngitsut, namminerlu qanoq ataataarusunneq samminiarpaat. Taakku 300.000 koruuninik aningaasaliiffigineqarput.

AAMMA ATUARUK Isiginnaagassiorfik kiisami aningaasannattoq

Nunatta Isiginnaartitsisarfiata juullimut isiginnaartitsisssutaa Qaanaami innuttaasunut iluatsilluartumik takutinneqaqqammerpoq, Ujarneq Fleischerillu inuusanik meeqqanut isiginnaagassiaa ”Ukki”Qaanaami aamma takutinneqartussanngorpoq. Tamatumunngalu 130.000 koruunit aningaasaliissutigineqarput.
 
Qitittartoqatigiit Qiajuk Productions aningaasanik agguaassinermi tunineqarnerpaapput, qitimmik isiginnaagassiaq 15-init 25-nut ukiulinnut sammitinneqartoq, IdentiD, kinaassutsimut – imminut nassaariniarnissamut – tunngassuteqartoq millionip affaanik aningaasaliiffigineqarluni.

AAMMA ATUARUK Kulturikkut suliniutit 18-it Aningaasaateqarfik Sermeq aqqutigalugu tapiiffigineqartut

Qasigiannguani Tae Kwon Dortartut nipilersoqatigiit Siissisoq tusarnaartitsisinissaannut aamma aningaasaliiffigineqarput, Juaaka Lyberthilu Svantep Ileqqorsuutaanik kalaallisuunngortitsinissamut aamma aningaasaliiffigineqarluni.
 
Aningaasat katillugit 2,3 millionit koruunit missaat agguaanneqarput.
 
Suliniutit aningaasanik tunineqartut 20-t allattorsimaffiat uani takuneqarsinnaavoq.

Tulliani qinnuteqarnissamut piffissaliussaq tassaavoq februaarip aallaqqaataani 2019. Namminersorlutik Oqartussanit Kulturimut aningaasaliissutit pillugit paasissutissat sukumiinerusut nittartakkami Sullissivik.gl-imi pissariarineqarsinnaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat