21-nik ukiulik Illoqqortoormiuni katititsivoq

Kommuneqarfik Sermersuup nittartagaani tamanna atuarneqarsinnaavoq.

Angut inuusuttoq 21-inik ukiulik, Illoqqortoormiuni sumiiffimmi qinikkamut sinniisussaq, borgmesterimit piginnaatinneqarluni katitsivoq. Juulut Danielsen, Inuit Ataqatigiit sinnerlugit kommunalbestyrelsimut kingullermik qineqqusaaraluarnermi kingorna, sumiiffimmi qinikkamut sinniisussaanermini takorloorsimanngisaraluaminik oktobarip ulluisa 30-anni misigisaqarpoq:

- Katititsissallunga tusaqqaarakku soorunami pissanganarpoq. Inuit ikittuinnaat misilittagaqarfigisaannik misiliilluni nuannerpoq imminullu tatiginerulernermik kinguneqarluni. Inuusuttoqatima tusaramikku aamma upperinngikkaluarpaannga, Juulut oqaluttuarpoq.

Nulianngortorlumi Juulup katititaa aamma pissangasimavoq:

- Katinnissarput tassanngaannartumik aalajangiunnikuuarput, katikkiartulerattalu aatsaat pissangaleraluarpunga, kisianni nuanneqaaq qaangerluarparpullu, Eva Sanimuinnaq oqaluttuarpoq.

Juulut Danielsen qineqqusaaqqissanerluni suli aalajangersimanngilaq:

- Politikkimik malinnaallunga nuannariuaannarpara aamma suli ilikkagassaqaqaanga, taamaattoq maannangaaq oqaatigisinnaanngilara tullianik qinersinissamut qineqqusaaqqissanerlunga, Juulut Danielsen oqarpoq.