2050-imi millionilippassuit eqqugaassasut

Allattoq Najaaraq Egede
maajip 04-at 2006 17:45

Nutaarsiassaajunnaarpoq sermersuatta aqunneqarsinnaanngitsumik aakkiartornera. Naatsorsorneqarpoq taamatut sukkatigisumik aakkiartuinnassappat 2050-imi inuit millionilippassuit panernersuarnit eqqugaassasut.

Tuluit aviisianni The Times-imi allaaserineqarpoq Naalagaaffiit Peqatigiit pinngortitap pissusiinik ataatsimiittartoqatigiit nalunaarusiami inernera saqqummiutilersaaraa. Ilisimatuut tusindillit arlallit nalunaarusiornermi peqataasimapput.

Nalunaarusiami atuarneqarsinnaavoq silaannaap gradinik pingasunik kissatsinnerunissaa, taamaalippallu nunarsuatsinni inuit 400 millionit kalluarneqassasut. Sermersuarput aappat nunat pukkitsut qarsutsiffiussapput, inuuniarnerlu aserorneqassalluni.

EU-mi nunat ilaasortaatitaasa siunniuppaat silaannarmik kissatsisitsisup CO2p annikillineqarnissaa, silaannaq gradinik marluinnarnik kissatsissinnaaqqullugu.

Nalunaarusiaq pisartut malinnagit saqqummiunneqarpoq – nalinginnaanngitsumillu tamanit atuarneqarsinnaalereerluni. Pissuserineqartaraluarpormi naalagaaffiit naalakkersuisuisa ilisimatuullu ikittuinnaat nalunaarusianik ilisimatinneqartarneri.

USA-mi naalakkersuisut qarasaasiakkut atuarneqarsinnaanngorlugu saqqummiussimavaat, immikkullu ilisimasallit nalileeqqullugit.

Pinngortitamik illersuiniaqatigiit ernumapput, isumaqaramimmi pinngortitap kissakkiartornerata nalunaarusiornerata saqqummiunneqarneragut USAp naalakkersuisuisa inerniliineq uppernarunnaarsarnialeraat.

Danskit avatangiisinut ministeriat Connie Hedegaard nalunaarusiamut oqaaseqarumanngilaq, tusarniaassutigineqaqqaassammat.