2018-imut aningaasanut inatsisissaq Inatsisartuni siullermeerneqassaaq
Isertitakinnernut akunnattumillu isertitalinnut sulinermut ilanngaateqartitsinikkut akileraarutinik appaanissaq Naalakkersuisut isumaliutigaat, tamanna 2018-imut aningaasanut inatsisissatut siunnersuummi atuarneqarsinnaavoq.
Aamma hashimik anngiortumik eqqussuinerup akiorniarneqarnissaanut aningaasanik amerlanerusunik immikkoortitsinissaq peqqinnissaqarfimmullu aningaasaliissutit amerlineqarnissaat kissaatigineqarpoq.
AAMMA ATUARUK Sulinermut ilanngaat isertitakkaanit aningaasalersorneqarsinnaasoq
Naalakkersuisut missingersuutinit 7 milliardit koruunit missaanniittunit 2018-imi 8,6 millionit koruuninik sinneqartooruteqarnissaq naatsorsuutigaat.
Aningaasanut inatsisissatut siunnersuut oktobarip 23-ani aappassaaneerneqassaaq, pilersaarutillu malillugit inatsisartut ukiaanerani ataatsimiinneranni ullut kingulliup tulliani novembarip 15-iani akuersissutigineqartussaassalluni.