2017-imi angalanissamut pilersaarutinik Brugseni ujartuisoq

Royal Arctic Linep angalanissamut pilersaarutai 2017-imoortut Kalaallit Nunaanni Brugsenimit utaqqikatalluinnarneqarput.
Assi © : Google Street View
novembarip 02-at 2016 07:13

- Royal Arctic Linemut arlaleriarluta pilersaarutit paasiniarlugit saaffiginnittaraluarput.

Taakkuli naalakkersuisunut innersuussiinnartarput, Kalaallit Nunaanni Brugsenimi pisortaq, Susanne Christensen allakkani ammasuni taama tunngavilersuivoq.

- Angalanissamut pilersaarut 2017-imut tunngasoq qanorpiaq isikkoqassanersoq ilisimanagu erloqinaqaaq, taamaattumik
massakkut iliuuseqartariaqalerpusi, aatsaammi taamatut nalaataqanngilavut, Susanne Christensen nassuiaavoq nangillunilu:

- Suliffeqarfitsinnut pisisarfitsinnut pisinianullu nuanninngitsumik kinguneqarnerlussinnaavoq. Soorlu nioqqutissat aalajangersimasut amigaatigineqaleriaannaapput nioqqutissanilluunniit eqqaaginnartoqartariaqarluni.

Naalakkersuisut sooruna iliuuseqarnianngittusi? Kalaallit Nunaanni Brugsenimi pisortaq, Susanne Christensen aperivoq.