2015-imi qilaluartassat, aavertassat taamatullu nannuttassat agguaanneqarput
Qaqortanik qernertanillu qilaluartassiissutit eqqarsaatigalugit, taakku Naalakkersuisuusimasut ukiunut pingasunut pilersaarutaat, ulloq decembarip 31-anni 2012-imi akuersissutigineqartut, ingerlateqqinnissaat Naalakkersuisumit akuerineqarlutik.
Pisassiissutit taakku aalajangerneqartarput, nunat tamalaat akornanni isumaqatigiissutit, biologit siunnersuinerat, atuisut ilisimasaat kiisalu Piniarneq Pillugu Siunnersuisoqatigiinnik tusarniaasimaneq tunaartaralugit.
Tassalu qilalukkat qaqortat 2015-imi pisassiissutigineqartut 350-it Nunatta kitaani pisarineqarsinnaallutik taamatullu qernertat 398-it pisarineqarsinnaallutik. Tunumut pisassiissutit ukiunullu tulliuttunut pingasunut akuersissutigineqarput qernertat ukiumut 88-it pisarineqarsinnaaneri.
Avanersuarmi, Kitaani Tunumilu aavertassat 2015-imi pisarineqarsinnaasut katillugit 173-upput. Avanersuarmi 83-ulluit, Kitaani 69-iullutik Tunumilu 18-nit pisassiissutigineqarlutik.
Nannut 2015-imi Nunatsinni tamarmi pisarineqarsinnaasut 140-pput. Kangaatsiamiit Savissivik ilanngullugu 67-it pisarineqarsinnaallutik, Qaanaami arfinillit, Sisimiuniit Paamiut tikillugit pisarineqarsinnaallutik pingasut taamatullu Narsami, Qaqortumi, Nanortalimmi Tunumilu katillugit pisarineqarsinnaallutik 64-it.
Pisassiissutit qanoq agguataarneqarsimanersut sukumiinerusumik ilisimasaqarfiginiaraanni, Namminersorltuik Oqartussat nittaartagaanni, www.nanoq.gl -imi tamakku atuarneqarsinnaapput.