2012-mi kulturi Mimi Karlsenip isaanik isigalugu
Mimi Karlsenip akisussaaffeqarfiani pisussat annertuut ilagaat Arctic Winter Games, Nunatsinni illoqarfiit pingaarnersaanni Nuummi 2016-imi ingerlanneqartussaq. Mimi Karlsenip ataani ingerlatsivimmi tamanna ulapputigineqalereersimavoq.
-Piareersaatit aallartereerpagut, Kommuneqarfik Sermersuumilu borgmesteri Canadamiullu kultureqarnermut ministerii ingerlaavartumik ataatsimeeqatigisarpakka, unammiuaaqatigiinnerummi nalaani pisussat arlariit ataatsikkut ingerlanneqartussaammata, Mimi Karlsen oqaluttuarpoq.
Isiginnaartitsisartoqarneq pillugu inatsit 2011-mi akuerineqarmat, Nunatsinni isiginnaartitsisartunngorniarfimmik pilersitsisoqarnissaa aalajangerneqarpoq. Tamannalu ukioq manna piviusunngortinneqarpoq.
- Isiginnaartitsisartunngorniarfik pillugu inatsit siorna inissinneqarpoq, ilinniartullu siulliit ukiap ingerlanerani aallartissinnaanngorlutik. Tamannalu isiginnaartitsisartunngorniarfimmik aamma pilersitsisimanitsinnik isumaqarpoq.
Kalaallisut oqaatsitta Nunatsinni pisortatigoortumik oqaasiunissaannik aalajangertoqarnerata kingorna, oqaatsitta atatiinnarneqarnissaat ineriartortinneqarnissaallu pillugit isummat assigiinngitsorpassuit saqqummersimapput. Inatsisiliortut tungaannit tamanna iliuuseqarfigineqassaaq.
- Suliniuterpassuit pingaaruteqartupilussuit aallartisarsimasatta ilagaat oqaatsinut politikki. Oqaatsit pillugit politikkimut allannguutissatut siunnersuummik suliaqarpugut, taannalu Inatsisartut upernaakkut ataatsimiinneranni saqqummiunneqassaaq. Tamatuma saniatigut aamma iliuusissatut pilersaarummik allamik suliaqarpugut, taannalu nakuusertarnerup ajornartorsiutigineqarnerata unitsinnissaanik suliaqarnitsinni ikorfartuutaassaaq. Taanna aamma Inatsisartut upernaakkut ataatsimiinneranni saqqummiunneqassaaq. Suliniutigisatta akisussaaffeqarfiit, pisortat suliffeqarfii allat kommunillu tamaasa pitarlugit suliarineqarnissaat Naalakkersuisuni pingaartipparput, taamaaliornikkut tamattaalluta kivitseqatigiinnissarput angujumallugu, ilaqutariinnermut, kultureqarnermut, ilageeqarnermut naligiissitaanermullu naalakkersuisoq Mimi Karlsen nassuiaavoq.