2010 ukioq kiannerpaaffiuvoq
Silap pissusaa pillugu Københavnimi decembarimi ataatsimiittoqarmalli Danmarkimi nunanilu killerni qiianarpoq, maajillu qaammataa ukiuni 14-ini kingullerni aatsaat taama qiianartigaluni. Nutaarsiassaqartitsivik Ritzau taama allappoq.
Kiannerpaaffiup qiianarnerpaaffiullu imminnut assortuunnerat Kathrine Richardsonip takusinnaavaa:
- Danmarkimi nunanilu killerni ukioq manna qiianarsimaqisoq nalunngilarput, tamannali nunani ataasiakkaani taamaallaat malugineqarpoq. Nunarsuarli ataatsimut isigalugu qaammatini kingullerni sisamani aatsaat taama kiatsigaaq. Kalaallit Nunaat kiannerulerpoq, Canadamilu ukiuunerani OL-ertoqarmat aputaasannera naammagittaalliuutigineqarluni, Kathrine Richardson oqarpoq.
Ukiut 2000-it aallartimmatali aatsaat taama kiatsigisimasoq, Kathrine Richardson isumaqarpoq. Taassuma aamma erseqqissaatigaa, nunani killerni ukioq kingulleq qiianarsimanera pissutaalluni silap pissusaata allanngoriartorneranik qularuteqartut amerliartormata:
- Qulartut amerlisimanerat ersarippoq. Ukioq kingulleq nunat ukiorlunnermik eqqugaasut innuttaat isumaqalersimapput nunarsuarput kissakkiartunngitsoq. Taakku upperisaq ilisimatusarnerlu akuleruppaat. Uangali qularutiginngilara kissakkiartormat, ilisimatusarnermilu suliaqartut akornanni aamma qulartut ikinneralaarsuupput, silap pissusaa pillugu immikkut ilisimasalik, Kathrine Richardson oqarpoq.
