2010 timersornermi pissarsiffiulluarpoq
Kalaallit Nunaanni Tinmersortartut Kattuffiata siulittaasua, Nuka Kleeman aamma ukiortaami oqaaseqaateqarpoq. 2010-mi nunarsuatsinni timersornikkut kalaallit takutitsilluarsimanerat siulittaasup nuannaarutigaa.
Allattoq Apollo Jeremiassen
januaarip 01-at 2011 17:08
Ilaatigut Taekwon-do-mik timersortartut EM-imi aamma VM-imi ujaminnapput aammalu arnat assammik arsartartut U/20-t siullermeerlutik VM-qataapput, taanna Korea Kujallermi ingerlanneqarluni.
2010 aamma tassaavoq Arctic Winter Games-eqarnerani Kalaallit Nunaanneersut ujamminik amerlasuunik pissarsiffiat.
Ukioq manna 2011-mi ilaatigut pilersaarutaapput Island Games, Tuluit Nunaata qeqertaani Isle of Wight-mi unamminissat.
Nuka Kleemannip aamma nuannaarutigaa kattuffiup aningaasaliisussaannik isumaqatigiissusiornerit iluatsimmata, soorlu Air Greenland, Faxe Kondi, Royal Greenland, Umbro aamma HAPS. Nuka Kleemann naggasiivoq oqarluni akissarsiaqaatiginagu ingerlatsisuusut qutsavigalugit, taakkoqanngippammi timersortartoqassanngikkaluarmat.
