2010-mi saattuartassat agguaanneqarput

2010-mi saattuartassiissutissat tamakkerlugit 3.900 tonsiussapput. Avataasiorlutik aalisartut 900 tonsinik pisassinneqassapput, tassani EU-p pisasai 500 tonsit ilanngunneqarlutik, sinerissap qanittuani saattuarniarluni aalisarnermi 3.000 tonsit pisassiissutigineqassallutik. Aalisarnermut piniarnermullu naalakkersuisoqarfik taama ilisimatitsivoq.
februaarip 27-at 2010 13:57

Avataasiorluni aalisarnermi amerlanerpaamik marlunnik aalisariuteqartoqarsinnaasoq, naalakkersuisut aamma akuersissutigaat.

Sinerissap qanittuani saattuartassat ima agguataarneqarput:

Qeqertarsuup Tunua 600 tonsit, Sisimiut 800 tonsit, Nuuk Paamiullu katillugit 1000 tonsit, Narsaq Qaqortorlu katillugit 300 tonsit taavalu Maniitsoq aamma 300 tonsit.

Sumiiffinni assigiinngitsuni aalisarnerup ingerlanneqarnera tunngavigalugu, kiisalu aqutsiveqarfinni ataasiakkaani aalisarnerup ingerlanneqarnerata annertuallaamik pinissaa pinngitsoortinniarlugu, qinnuteqartut amerlanerpaamik aqutsiveqarfimmi ataatsimi aalisarnermut akuersissummik tunineqarsinnaapput, naalakkersuisoqarfimmit allapput.

Piniarnermut aalisarnermullu Naalakkersuisup Aqutsisoqarfinni assigiinngitsunik pisassanik agguaasseqqissinnaanermik, kiisalu aalisariutit suut atorneqarsinnaanerat pillugu pisassiissutit tamarmiusut 3.900 tonsit iluini aalajangersaqqissinnaanermik piginnaatinneqarpoq.

Aqutsiveqarfinni assigiinngitsuni qinnuteqartunut ataasiakkaanut aalisarsinnaanermut akuersissutinik tunniussinermut tunngatillugu agguaassinissamut siunnersuutip qanittukkut akuerineqarnissaa naatsorsuutigineqartoq, Naalakkersuisoqarfik neriorsuivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq