2010-mi aatsaat taama kiatsigaaq

Nunatsinni sumiiffinni aalajangersimasuni 2010-mi qanoq kiatsigisimanera takuuk. Silasiortut pissutsit taamaaseqqeratarsinnaanerarpaat.

Nunatta kitaa aatsaat taama 2010-mi kiatsigaaq. DMI-mit kisitsisit saqqummiunneqarallartut tamanna takutippaat naatsoqqissaarnissaasali allanngortinnavianngilaat aatsaat taama kiatsigisimanera allannguut annertoqimmat.

Pituffimmiit aallarteriarutta taavani minus 7,9 gradenik agguaqatigiisillugu pueqqorsimavoq ukiullu kaajakkiartornerani taamaattuarsimavoq. Assersuutigalugu novemberimi agguaqatigiisillugu minus 9,6 gradenik ississimavoq 1984-imi minus 33,6 gradenik ississimagaluartoq.

Pissutsit Ilulissani aamma taamaapput 2010-mi agguaqatigiisillugu minus 0,1 gradenik pueqqorsimammat. Agguaqatigiisillugu silaannaap kissassusaa 4,9 gradenik qaffariarsimavoq. Tupinngilarlu qimussertartut ukiornissaa erinitsaatileraluarmassuk decemberimi agguaqatigiisillugu taamaallaat minus 0,9 gradenik pueqqorsimammat maliginnaasumik decemberi minus 9,2 gradenik issittaraluartoq.

- Immikkuullarissumik taamaasilluni rekordiliisoqarpoq, taama KNRimut oqarpoq DMI-mi siunnersortaaneq John Capellen.

Kangerlussuaq pussukulaartuinnanngorluni ississinnaasutut ilisimaneqartoq ilisarsaanngivippoq. Nunaqarfik taanna mittarfeqarfiusoq 2010-mi agguaqatigiisillugu minus 0,2 gradenik pueqqorsimavoq naliginnaasumit kiassusaa 5,5 gradenik qaffariarsimalluni. Assersuutitut decemberi agguaqatigiisillugu tallimaannanik issisimavoq.

Nuummi aamma ukioq utaqqikatanneqarsimavortaaq decemberimi agguaqatigiisillugu minus 0,1 gradiinnarnik pueqqorsimalluni naliginnaasumik agguaqatigiisillugu minus 6,2 gradenik juullip qaammataa issittaraluartoq. Nuuk 2010-mi agguaqatigiisillugu plus 2,6 gradenik kiassimavoq naliginnaasumik kiassusaasartumit 4 gradenik kiannerulersimalluni.

Narsarsuaq 2010-mi aatsaat taama kiatsigisimavoq agguaqatigiisillugu 5,4 gradenik kiassimalluni kujataani nunaqarfik mittarfeqarfiusoq taanna naliginnaasumik 4,5 gradenik kiannerulersimavoq.

Tunumi kiannerpaaffiusimanngilaq taamaattorli Tasiilami Ittoqqortoormiinilu kiatsinnera malunnarsimaqaaq rekordiliingajassimallunilu.

DMImit tunuarsimaarput 2011-ip qanoq innissaata siumut siulittuutiginissaanut, kisianni....

- Silaannaap pissusaa taamaaginnassappat ilimanarsinnaalluarpoq 2011-mi ukioq aamma issikitsuararsuussasoq Europalu aperujussuaqqilluni, taama John Capellen oqarpoq, oqaatsinili aappaatigooqartillugit.

- Sapaatip akunneranut ataatsimut marlunnulluunniit taamaallaat ilimasaarusiorsinnaasarpugut taamaattumik 2011 aalajangersimavissumik siulittuuteqarfigisinnaanngilara. Tassami silaannaap pissusaa aamma allanngoratarsinnaavoq, taama John Capellen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat