2009-mut aningaasanut inatsisissaq naanguna?
Tamanna KNR-ip nutaarsiassaqartitsiviani eqqumiigaarput, taamaattumillu aningaasaqarnermut pisortaqarfimmi pisortaq Peter Beck aperaarput: naanguna 2009-mut aningaasanut inatsit?
- Aningaasanut inatsit maanna suliarineqaleruttorpoq. Naatsorsuutigaarput aaqqitassat tamarmik aaqqinneqareerpata maanna sapaatip akunnerata naanerani naqiterivimmut ingerlateqqissinnaassallutigu. Naqiterneralu naammasseriarpat 2009-mi januaarimi sapaatip akunnerani siullermi Inatsisartunut ilaasortanut nassiussuunneqarsinnaajumaartoq.
Peter Beck aperineqarami aningaasanut inatsisissaq novembarip qiteqqunneranili akuerineqarmat, tamanut saqqummiunneqarnissaa kingusinnginnersoq, akivoq, tamanna kingusigineqarsinnaasoq.
- Taamaattorli aningaasanut inatsisissaq Inatsisartunit akuersissutigineqaraangat, taava inatsisissap Inatsisartuni aappassaanneerneqarnerani pingajussaanneerneqarneranilu allannguutissatut akuerineqartut inatsimmut ilanngussuuttarpavut. Ukiormannalu pisortaqarfinnik allanngortiterineq pissutigalugu inatsisissatut siunnersuummi ilaanngikkaluartut allannguutissaat inatsisissamut ilanngussuuttariaqarsimavavut. Immikkuualuttorpassuillu allannguutaasut, Inatsisartuni akuersissutigineqartut kontonut assigiinngitsunut iluarsartuunnissaat piffissaajaataangaatsiarpoq.
Peter Beck aperineqarpoq, aningaasanut inatsisissaq politikerit tigoreersimaneraat, tassami suleriaqqinnissaminni atortussaammassuk.
- Suli tigunngilaat, soorlu oqaatigeriikkattut iluarsiissutissat maanna suliarileruttoratsigik suli agguaassinnaannginnatsigu, tassa suliassaq siornatulli ingerlapparput, Peter Beck naggasiivoq.
Aningaasanut pisortaqarfimmi pisortap Peter Beckip naatsorsuutigaa, 2009-mut aningaasanut inatsisissaq, sapaatip akunnerata tulliani internetikkut pissarsiarineqarsinnaalissasoq.
