2009-mut Aningaasanut Inatsimmik allamik Inuit Ataqatigiit kissaateqarput

Inuit Ataqatigiit illuatungaatigut piumasaraarput sipaarniutit, soorlu pinaveersaartitsinernut, ilinniartitaanerup qaffassarneqarneranut suliniutit, pisortat inissialiortiternerinut aamma kulturikkut siunnerfilimmik suliniutinut, soorlu højskolinut, tunngasut, peerneqassasut.

2009-mut Aningaasanut Inatsisissamut akileraarutit akitsuutilluunniit qaffanneqarnissaanik Inuit Ataqatigiit kissaateqanngilagut, isumaqarlutalu akileraarutitigut akitsuutitigullu maanna nammagassat naammareeersut.

- Inuit Ataqatigiinni isumaqarpugut aaqqissuussinikkut allanngortiterinissaanut eqqarsartariaqalersugut, teknikkikkullu naapertuuttunngorsaarinerit atorlugit inatsisissatut siunnersuusiornikkut sipaarniutissarsiorneq kisiat atornagu. Aningaasanut Inatsit inatsisillu atuuttut Inatsisartunilu aalajangiiffigineqareersut naapertorlugit aammattaaq atortinneqartariaqarpoq. Allannguutit annersaat tassaasariaqarpoq inuiaqatigiit ataatsimoorussamik pisuussutaasa akileraarusersorneqarnerinut tunngasut, aammalu maannamut akuersissutaareernikuusunut allanngortitsinernut annertuunut tunngasut, soorlu kommunit aaqqissuuteqqinneqarnerat, ilinniartitaanerup nutarterneqarnera aamma assigiimmik akeqartitsiunnaarnermut tunngasut.