2009-mi saarullittassat akuersissutigineqarput

Saarulliit amerlanerpaaffiattut, TAC-mik taaneqartartoq, katillugit 20.000 tonsiunissaat Naalakkersuisut aalajangiuppaat.

TAC agguaanneqarpoq sineriassortunut 10.000 tonsit pisassiissutigineqarlutik, avataasiorlunilu saarullinniartunut aamma 10.000 tonsit, tassani EU-mut nunanullu allanut pisassiissutigineqartut ilaallutik.

2009-mi aalisarnissami saarullinnut TAC-ip aalajangiiffigineqarnera, akuersissutigineqarpoq, saarullinnillu aqutsinissamut pilersaarut ingerlatiinnarneqassasoq saniatigut akuersissutigineqarpoq, tukertut nutaat malunnaatilimmik amerleriarnerannik Imavinni misissuinerit pillugit nunat tamalaat siunnersuisartoqatigiiffiata, ICES-ip, takusaqarnissaata tungaanut.

Saarulleqarnerup naleqqussarneqarnissaanut nalunaarummik Aalisarnermut, Piniarnermut Nunalerinermullu Naalakkersuisoqarfik suliaqassaaq, saarulleqarnermillu nakkutilliinerup ingerlaavarnissaa qulakkeerneqassalluni.

Taamaattumik siunissami aningaasarsiutigalugu imminut napatittumik saarullinniarsinnaaneq Finn Karlsenip anguniarpaa.