2009 aaqqissuusseqqissaarnermut atorneqassaaq

IA-meersoq Bendt B. Kristiansen aamma Qaasuitsup kommunissaani borgmesterinngortussaq Siumumeersoq Jess Svane ullumi uparuaapput Qaasuitsup Kommunissaanut, Siumut asuli kinguarsaaniarsarisoq.

Hans Enoksen, KANUKOKA-p ataatsimeersuarnerani Qaasuitsup kommunissaa angivallaarnerarlugu ingerlanneqarneralu akisuallaassanerarlugu oqareerluni, maanna eqqissisaalerpoq.

- Isumaqarpunga eqqissiviilliuutissaanngitsoq. Ajornartorsiut annertooq massakkut nalaakkiartorparput… kommunit aningaasaqarnerisa inissisimanerat pitsaanerpaanngilaq, tamannalu pissutigalugu qinikkat oqaloqatigiilluartariaqarput siunertaammammi, innuttaasunut ajorseriaataanngitsumik akerlianilli akikillisaataasumik aaqqissuussinerit aallartinneqarnissaat, Hans Enoksen aallartippoq.

Kommunit januaarip aallaqqaataani kattussuutilissapput.

- Aap, ilumoorpoq, kisianni komuunit namminneq kissaatigaat 2009 tamaat namminneq iluminni aaqqissuussinermut atorniarlugu. Tigooqqaanissat kingusinnerusukkut aatsaat immaqa 2010-mi 2011-imilu pinissaat eqqartorpagut. Taamaattumik sulinerup pitsaasumik tunngavissinneqarnissaa uagutsinnut pingaarnerpaajuvoq… kommunerujussuit aallartinnissaat taanna nanertuutiginiarsarinagu, Naalakkersuisut siulittaasuat erseqqissaavoq.

Aperaarput taamaappat kommunerujussuit sisamat siunissami tallimanngornissaat arfinilinngornissaalluunniit takorloorneraa.

- Naamik, massakkut oqaatigisinnaanngilara. Namminneq aaqqiiniarnissaminnut piumassuseqarlutik oqareermata, toqqissilluta malinneeqqissaassaagut. Sapinngisarpullu tamaat ikiuutissalluta, Hans Enoksen oqarpoq.

Ulloqeqqaanerani radioaviseqarnitsinni Qaasuitsup Kommuneani borgmesterissaq Jess Svane oqarpoq, pingaarnerpaaq tassaalersoq sulisut innuttaasullu toqqissisimatinnissaat, maannalu Ilulissani Siumukkut oqallitsitsinerat toqqisisimananngitsoq.

- Piviusut isertuullugit ernumatitsiniaannarneq suli ilungersunarnerussaaq, kisianni piviusut erseqqissumik eqqorneqartussanut saqqummiullugit toqqissisimanarnerungaassaaq, naggasiivoq.