2008 ukioq assuarnartuliorfik akisussaassuseqanngitsuliorfillu

Ukioq 2008 ukiuuvoq eqqumiilluinnartoq, taama oqarpoq tusagassiortoq politikkikkullu naliliisartoq Elna Egede. Elna Egede isumaqarpoq politikerit ukioq manna arlaleriaqalutik assuarnartuliortut akisussaassuseqanngitsuliorlutillu. Aammali nuannaarutissaqarpoq. Elna Egede isumaqarpoq Namminersornermut amerlanerussuteqarluartut akuersinerat nuannaarutissaasoq angisooq.

Kalaallit Nunaanni innuttaasut akornanni

namminersorneq pillugu taasisitsineq ukioq 2008-imi pingaarnerpaarsimavoq malinnaaffigineqarnerpaasimallunilu, tusagassiortoq Elna Egede oqarpoq. Taasisitsinermi taasiartortut amerlanerujussuat malunnarpoq, naak soorlu kommunalbestyrelse-mut qinersisoqartillugu qinersiartortartut taamak amerlatigineq ajortut. Nuummi qinersisartut tunuarsimaartaraluarlutik tunuarsimaaraatik taasiartorsimanerat maluginiarneqarpoq. Qinersisartut akornanni taasinermi, taasisut sisamaagaangata pingasut namminersornermut akuersipput. ” Tassa maassa ukua taasitsiniartut ( naalakkersuisut inatsisartullu) paatsiveqanngitsut ! taakkua pisorsuit pigaluartut, innutaasut nammineq aalajangerpaat namminersorneq akueriniarlugu” tusagassiortoq Elna Egede Kalaallit nunaanni ukioq 2008-imi pisut pillugit naliliinermini taamatut oqarpoq.

Elna Egedep aamma oqarpoq mannakkut politikerit namminersornermut ikaarsaarnissamut suliaqartissallugit tatiginanngitsut taamaattumillu kissaatiginerarpaa piaartumik qinersisoqarumaartoq.