Ukiumut siulianut naleqqiullugu sinneqartoorutit appariarput, Tele Greenlandilu naapertorlugu imaatigut kabelimut aningaasaliisimaneq tamatumunnga pissutaavoq.
Taamaakkaluartoq Tele Greenlandip pisortaanera, Brian Buus Pedersen, naammagisimaarinnippoq.
- Ukiuni kingullerni annertuumik aningaasaliinitta kingunerisaanik, ernianut ingerlatsinermullu aningaasartuutit nutaat akilersornissaanut, 2009-mi aningaasaqarnikkut ingerlalluarnissaq pingaaruteqarluinnarpoq, imaatigut kabelimut, "Greenland Connect"-imut 3/4 milliardi koruuninik aningaasaliisimanitta minnerunngitsumik kingunerisaanik, Brian Buus Pedersen oqarpoq.
Tamatuma saniatigut sullitaminnut inuussutissarsiummik ingerlatalinnut qarasaasiatigut internetikkullu atuinermi akinik appaanissap ukioq manna juulip ulluisa aallaqqaataanni atuutilernissaa Tele-p Namminersornerullutik Oqartussanut qinnuteqaatigaa.