2008 tassaavoq FN-ip oqaatsinut ukiorititaa

Naalagaaffiit Peqatigiit immikkoortortaqarfiata ilaata UNESCO-p suleqataaneratigut aalajangiunneqarpoq, ukiormanna taassaassasoq nunat tamat akornanni Oqaatsit Ukiuat.
Allattoq Mads Lynge
januaarip 03-at 2008 07:55

Tamanna malunnartinniarlugu Naalagaaffiit Peqatigiit aaqqissuussaannik maanna New Yorkimi Naalagaaffiit Peqatigiit allaffeqarfianni nunat inoqqaavineersut immikkut paasisimasallit arfineq-marluk oqaatsit pillugit ataatsimiitinneqassapput, Naalagaaffinni Peqatigiinni Nunat Inoqqaavi pillugit isummersoqatigiiffimmut sinniisut peqatigalugit.

Taakkununnga arfineq-marluusunut ilaavoq Carl Chr. Olsen, Puju, Nunatsinni Oqaasileriffiup pisortaa aamma ICC-mi siulersuisunut ilaasortaasoq. Puju naggueqatigiit Inuit oqaasiinik paasisimasalittut peqataassaaq. Nunat inoqqaavisut oqaasillit allat peqataatinneqartussat tassaapput: Berberit, Indianerit, Ruslandimi nunat inoqqaavi, Asiami nunat inoqqaavi aamma Amerikami Kujallermi nunat inoqqaavi quechuamik oqaasillit.

Ataatsimiittussat taakku eqqartussavaat nunat inoqqaavisa oqaasii qanoq ataavartinneqarnissaat kisiat eqqartornagu siunissami oqaatsisut atugaasinnaassanersut, allataaseqarnikkut. Inuiaqatigiit oqaasiisut, kulturikkut ilisarnaatitut allatullu eqqartussavaat..

Ataatsimiittut isummiutaat Naalagaaffinni Peqatigiinni immikkoortunut allanut ingerlateqqinneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq